‘Yan Bindiga Sun Hallaka Mutum Daya, Sun Sace 10 A Jihar Neja

‘Yan bindiga sun kashe mutum daya sannan sun yi awon gaba da wasu mutune 10 a Tudun Magaji da ke a karamar hukumar Kontagora a Jihar Neja.

Lamarin wanda ya auku a makon da ya wuce, an ruwaito cewa, sun kai farmakin ne da misalin karfe 12:30 na dare.

• Mun Tara Wa Dan Takarar Gwamnanmu Miliyan 511 A Kano – NNPP
• NIS Ta Kwato Katin Zabe 106 Daga Hannun Bakin Haure A Kwara

‘Yan bindigar sun shiga gida-gida inda suka sace mutane, sannan suka kashe mutumin yayin da yake kokarin guduwa.

An kai wadanda suka samu raunuka Babban Asibitin Kontagora don kula da su, inda kuma ‘yan sintiri tare da hadin guiwar jami’an tsaro suka bazama farautarsu domin kubutar da wadanda suka sace.

Wani mai suna Kabiru Mohammed, wanda yana daya daga cikin wadanda suka samu rauni, ya ce ya jiyo muryar kishiyar mahaifiyarsa tana ihu da misalin karfe 2 na dare.

A cewarsa, ‘yan bindigar sun sace mutune biyu a gidansa, inda ya kara da cewa, da farko ya dauka masu fyade ne domin bai ga bindiga a hannunsu ba, amma ya ji karar harbin bindiga, sai ya yi saurin shigewa gida sai dayansu ya biyo shi ya kwada masa wata sanda.

Shi ma wani mai suna Yakubu Shuaibu wanda ‘yan bindigar suka harba ya ce, yana a cikin dakin matarsa ta biyu ne sai ya ji uwar gidansa na ihu bayan ya fito don ya ga me ke faruwa, sai daya daga cikin maharan ya harbe shi a ciki.