Wasu ‘yan bindiga sun kai hari a karamar hukumar Toro da ke Jihar Bauchi, inda suka kashe wasu matasa biyu tare da yin garkuwa da mutum daya.
Wata majiya daga yankin ta shaida wa Leadership Hausa cewa ‘yan bindigar sun far wa garin ne da tsakar daren ranar Juma’a, da misalin karfe 1:20 zuwa 2:30.
- Sin: Abubuwan Dake Cikin Rahoton Tsaron Amurka Na 2022 Game Da Sin Tsohon Tunani Ne Na Yakin Cacar Baka
- Manoman Alkama 200 Za Su Amfana Da Shirin NALDA A Jihar Jigawa
Majiyar ta koka da cewa a duk tsawon wannan samame babu wani jami’in tsaro da ya kai dauki yayin da ‘yan banga suka rasa yadda za su yi da maharan, domin ba za su iya fuskantar maharan da ke dauke da muggan makamai ba.
Leadership Hausa ta kuma tattaro cewa wadanda aka kashen sun hada da Abba da Anas Wanzam yayin da aka yi garkuwa da Abdulrahman Danmalam.
A halin da ake ciki dai, rundunar ‘yansandan jihar ba ta tabbatar da faruwar lamarin ba saboda, kakakin ‘yansandan jihar, SP Ahmed Wakili bai amsa sakon waya da aka aike masa domin tabbatar da faruwar lamarin.
