‘Yan Bindiga Sun Kashe Mutane 6, Sun Sace 38 Tare Da Ƙone Dukiyoyi A Katsina

‘Yan Bindiga ɗauke da muggan makamai sun kai farmaki wani kauye mai suna ‘Yan Nasarawa da ke cikin ƙaramar hukumar Faskari ta jihar Katsina inda suka kashe mutane 6 sannan suka yi awan gaba da 38.

Rahotanni sun bayyana cewa, ‘yan bindigar sun shiga ƙauye ne a daren ranar Litinin inda suka riƙa harbi kan mai uwa da wabi ba kakkautawa.

• ‘Ƴan bindiga Sun Kashe Mutum 12 A Kaduna
• Mbappe Ya Amince Ya Koma Real Madrid Akan Kwantiragin Shekaru 5 A Karshen Kakar Wasa Ta Bana

Daga cikin waɗanda ‘yan bindiga suka kashe harda mai unguwa Malam Haruna Wakili.

Ya zuwa lokacin haɗa wannan rahoto an yi jana’izar waɗanda suka rasa rayukansu a wannan mummunan hari na wuce gona da iri da ‘yan bindiga suka kaiwa wannan gari.

Shaidun gani da ido sun bayyana cewa bayan kashe mutane 6 da suka yi , sun koma kone motoci 8 da shaguna 10 da gidaje 6 a cikin garin na ‘Yan Nasarawa.

Har ila yau wannan hari ya rutsa da shanu da dama wanda ya zuwa lokacin haɗa wannan rahoto ba a san adadin su, suma tuni sun kone sakamakon cinna masu wuta da ɓarayin suka yi.

Koda muka tuntuɓi rundunar ‘yansandan jihar Katsina ta bakin kakakin rundunar, ASP Abubakar Sadiq Aliyu, ya tabbatar da faruwar lamarin inda ya ce, tuni sun tura jami’an tsaro domin kewaye dajin da ɓarayin suke

Haka kuma ya bada tabbacin kamo waɗanda suka aikata wannan ta’asa tare da gurfanar da su a gaban kotu domin yanke musu hukunci.