Kungiyar Fulani Makiyaya Miyetti Allah Cattle Breeders Association of Nigeria (MACBAN) ta roƙi Majalisar Dokokin Amurka ta janye shawarar sanya wa ƙungiyar takunkumi bayan wani ƙuduri da ya danganta ta da cin zarafin ’yancin addini a Najeriya. A ƙudurin da aka gabatar a ranar 4 ga Nuwamba, ɗan majalisa Smith Christopher ya nemi a kakabawa MACBAN da Miyetti Allah Kautal Hore takunkumin hana viza da ƙulle dukiya, tare da ƙara wasu “Fulani-Ethnic Militias” cikin jerin Entities of Particular Concern (EPC).
A wani taron manema labarai a Abuja ranar Lahadi, Shugaban MACBAN, Baba Othman Ngelzarma, ya bayyana cewa sun aika wasiƙa ta ofishin jakadancin Amurka suna neman a cire sunansu. Ya ce ƙudurin ya cika da bayanan da ba su da tushe, yana jaddada cewa MACBAN ƙungiya ce ta doka wacce aka ƙaddamar tun 1986; ba ta da alaƙa da ayyukan tashin hankali ko ƙungiyoyin miyagun mutane.
- Musulmin da Aka Kashe A Zamfara, Katsina Da Sokoto Sun Ninka Na Kiristoci A Tsakiyar Najeriya: MACBAN
- Kungiyar Fulani Ta MACBAN Ta Nesanta Kanta Daga Zanga-zangar Matasa
Ngelzarma ya ce ƙudurin ya haɗa makiyaya masu bin doka da miyagun ƙungiyoyin da ke aikata laifuka, alhalin makiyaya su ma na fama da mummunan hari. Ya bayyana adadin asarar da aka tafka daga 2015 zuwa 2025, ciki har da mutum 18,600 da aka kashe, fiye da 1.29 miliyan da suka rasa gidajensu, gidaje 87,543 da aka ƙone, da sama da miliyan ɗaya na shanu da aka sace ko kashe. Ya ce waɗannan alkaluma sun nuna “al’umma da ake zalunta, ba wadda ke aikata zalunci ba.”
Ya kuma yi nuni da irin rawar da MACBAN ke takawa wajen samar da sulhu ta hanyar aiki tare da sojoji, ’yan sanda, NSCDC, sarakunan gargajiya da ƙungiyoyin ƙasa da ƙasa kamar USAID, Mercy Corps, Search for Common Ground da Centre for Humanitarian Dialogue. A cewarsa, ƙoƙarin MACBAN wajen tsaro da sulhu ya kamata ya kasance wani ɓangare na binciken Amurka.
Majalisar Dokokin Amurka za ta gudanar da zaman sauraron bayanai a ranar Alhamis kan matakin da ake son ɗauka game da matsayin Najeriya a jerin Country of Particular Concern (CPC).
