‘Yansanda Sun Cafke Matar Da Take Sayen Katin Zaben Mutane

Rundunar ‘yansanda ta jihar Enugu ta kama wata mata mai suna Chinwendu Nnamani bayan bayyanar wani faifan bidiyo ta tana sayen katin zaben jama’a a jihar. 

Kakakin rundunar jihar DSP Daniel Ndukwe, a ranar Alhamis ya ce, Matar wacce ake zargi mai shekaru 41, jami’an tsaro na sashen CID na jihar ne suka cafko ta a ranar 31 ga watan Janairu 2023.

• ‘Yan Bindiga Sun Kashe Mutum 1 Yayin Da Suka Kai Hari Ofishin INEC Da Na ‘Yansanda A Anambra

A cewarsa, ana zargin Chinwendu da sayen katin zabe akan naira 1,000 duk guda daya.

DSP Daniel wanda ya bayyana hakan a cikin sanarwar da ya fitar ya ce, an kuma kama wani jami’in INEC mai suna Nkiruka dan shekara 38, bisa zarginsa da sayarwa matar da katunan zabe (PVC).

“Da zarar an kammala bincike za a maka su a gaban kotu kamar yadda dokar zabe da aka sabunta ta tanadar.” Inji DSP Daniel.