Daga Ahmed Muh’d Danasabe,
Gwamnan Jihar Kogi, Alhaji Yahaya Bello, a karshe ya fito karara ya bayyana aniyarsa ta tsaya wa takarar kujerar Shugaban Kasar Nijeriya a shekara ta 2023 idan Allah mai duka ya kai mu, inda ya ce, ya dauki aniyar tsaya wa takarar ne, domin ceto Nijeriya daga halin da ta samu kanta a ciki.
Ya ce, ya na da abubuwa da kuma cancanta da ake bukata na samar da shugabanci nagari ga Nijeriya.
Gwamna Bello, wanda ya yi hira da Jaridar Daily Independent a ranar Lahadi da ta gabata, ya bayyana cewa, ya shiga takarar ne, don magance dimbin matsalolin da ke addabar kasar, inda kuma ya bukaci ’yan Najeriya da su mara masa baya wajen fafutukar ’yanto kasar daga kalubale daban-daban da ta ke fuskanta.
Gwamnan, wanda har ila yau ya yi kira ga ’yan Najeriya da su bai wa Shugaba Muhammadu Buhari goyon baya a kokarin da yake yi na kai kasar da al’ummarta tudun-mun-tsira a tun lokacin da ya dare karagar mulki a watan Mayun 2015, ya kuma kara da cewa, idan Allah ya ba shi nasarar zama shugaban kasa a 2023, zai dora akan dimbin nasarorin da Shugaba Buhari ya samu.
“Ina kira ga kowa ya hada hannu da ni, don ’yanto kasar nan daga halin-ni-’yasu da ta tsinci kanta a ciki. Ya zama wajibi mu yi amfani da wannan dama da muka samu wajen ganin mun ceto kasarmu,” a cewar Bello.
“Da yardan Allah, shirye nake tsaf na shugabanci Nijeriya kuma zan samar da shugabanci nagari da ake bukata a kasar nan.
“Sai dai kuma Ina kira ga ’yan Najeriya da mu yi iyakar bakin kokarinmu wajen ganin mun bai wa gwamnati mai ci yanzu a karkashin jagorancin Shugaba Muhammadu Buhari goyon baya a kokarin da ta ke yi na ceto kasar nan daga halin da ta tsinci kanta ciki.”
A ’yan kwanakin nan dai, akwai kungiyoyi da dama daga sassa daban-daban na Jihar Kogi da ma kasar da kuma Majalisar Dokokin Jihar suka rika kiraye-kirayen Gwamna Yahaya Bello da ya fito takarar kujerar Shugaban Kasa a zaben 2023, idan Allah ya kai mu, inda suka bada hujjarsu da cewa gwamnan mutum ne matashi, wanda ke da kudiri da kuma akidar ciyar da Nijeriya gaba, idan aka ba shi dama.
