2023: Takarar Peter Obi Za Ta Bai Wa PDP Matsala A Lokacin Zabe – Ganduje 

Gwamnan Jihar Kano, Abdullahi Umar Ganduje, ya ce dan takarar shugaban kasa na jam’iyyar LP, Peter Obi abun “alheri” ne ga jam’iyyar APC, saboda zai kai PDP ga rashin nasara a zaben 2023.

Ganduje ya bayyana haka ne a wata hira da ya yi da gidan talabijin na Channels a ranar Litinin.

• Girgizar Kasa Ta Kashe Mutum 56 Ta Jikkata Daruruwa A Indonesia
• Xi Ya Kammala Ziyararsa a Ketare Ya Koma Kasar Sin

Da aka tambaye shi ko farin jinin Obi na iya kawo matsala ga jam’iyyar APC, gwamnan na Kano ya ce: “Tasirin fitowar jam’iyyar Labour tare da Peter Obi, ina ganin wannan al’amari ne mai kyau ga jam’iyyar APC domin babban abokin hamayyarmu shi ne PDP.

“Idan ka duba, mene ne tasirin siyasarmu a yankin Kudu maso Gabas?

“Kuri’un da muka samu daga karamar hukumar Nassarawa a cikin birnin Kano sun fi yawan kuri’un da APC ta samu a daukacin Jihohi biyar na Kudu maso Gabas.

“Kun ga idan aka samu matsala, a siyasance a yankin Kudu maso Gabas, PDP ce za ta sha wahala.”