Takarar Tinubu Da Shettima Babbar Nasarar APC Ce – Buni

Gwamnan jihar Yobe, Mai Mala Buni, ya taya dan takarar shugaban kasa na jam’iyyar APC, Asiwaju Bola Ahmed Tinubu, murnar zabar wanda ya cancanta a matsayin mataimakin shugaban kasa, Sanata Kashim Shettima.

Gwamnan wanda shi ne shugaban kwamitin riko na jam’iyyar APC, ya bayyana hadakar Tinubu/Shettima a matsayin tikitin nasara ga jam’iyyar.

• 2023: Tinubu Ya Zaɓi Kashim Shettima A Matsayin Mataimaki

Buni a wata sanarwa da ya fitar ta hannun babban daraktansa kan harkokin yada labarai, Alhaji Mamman, ya ce zaben Shettima zai wadata jam’iyyar da kyakkyawar damar samun nasara a zaben 2023 mai zuwa.

Gwamna Buni ya ce dan takarar shugaban kasa da mataimakin sa na jam’iyyar APC, mutane ne da ke da dimbin gogewa a harkokin shugabanci, don haka, zasu kai Njeriya tudun na tsira.