Sojoji Na Zargin Sarakuna Da Hannu A Kisan Dakaru 17 A Delta

Babban hafsan tsaron Nijeriya, Christopher Musa, ya ce sarakunan gargajiyar yankin Okuama da ke Jihar Delta, sun taka rawa a kisan da aka yi wa sojoji 17 a jihar.

A ranar 14 ga watan Maris ne, wasu fusatattun matasa suka kai wa dakarun bataliya ta 181 hari, tare da kashe sojoji 17 ciki har da Manjo guda biyu da kuma m Kyaftin guda daya.

• Gwamnatin Tarayya Ta Kara Kudin Wutar Lantarki A Nijeriya 
• Tsohon Shugaban NLC, Ali Ciroma, Ya Rasu

An kai wa sojojin harin ne lokacin da suke kokarin kwantar da tashin hankalin da ya kunno kai tsakanin kabilar Okuama da kuma Okoloba a jihar.

Hakan ta sanya rundunar ta ayyana neman wasu sarakuna takwas ruwa a jallo, sakamakon mutuwar manyan sojojin.

Basaraken masarautar Ewu, da ke yankin karamar Ughelli a jihar, Clement Ikolo wanda ya kasance cikin wadanda rundunar ke nema ruwa a jallo, yanzu haka yana tsare a hannun a Abuja.

Sai dai sarakunan gargajiyar sun ce basu da hannu a rikicin yankunan da ya kunno da hakan ya yi sanadin mutuwar wadannan sojoji 17.