14- Ana amfani da hulba a matsayin maganin ciwon tari da mura da kuma sauran ciwon sanyi da kan shafi makogwaro.
15- Haka nan, za ka iya amfani da hulba don maganin zafin jiki.
16- Hulba na taimakawa wajen samun lafiyar ciki, ta hanyar maganin matsalolin ciki.
17- Mata na iya amfani da hulba domin daidaita jinin al’ada ga matan da jinin ke yi musu wasa.
18- Ana amfani da hulba a matsayin maganin kaikayin gaba: Yadda za a yi amfani da shi shi ne, a samu hulba a hada da gishiri a dafa, sannan a jira ya huce yadda ba zai yi lahani ga jiki ba, sai a zauna a ciki zuwa tsawon wani lokaci, a kalla dai a samu kamar minti 30 a cikin wannan ruwa na hulba. Haka za a yi ta yi har zuwa lokacin da za a samu waraka.
Har ila yau, idan kina bukata za ki iya hada shayin hulbarki na sha ko kuma bayan kin dafa da gishiri, kin debi ruwan da za ki zauna; sai ki rage wani ki jefa tsamiya a ciki ki sha.
19- Hulba na matukar taimaka wa matan da ke fama da bushewar gaba; Ga matan da ke fama da matsalar bushewar gaba, sai su samu man ridi su rika zubawa a cikin ruwan dumi; suna zaunawa a ciki, sannan daga bisani sai su rika yin matsi da hulba, insha Allahu za a dace.
20- Hulba na maganin ciwon ciki, bayan mace ta haihu.
21- Ana amfani da hulba don gyaran nono: Bincike ya tabbatar da cewa, ana amfani da hulba domin gyaran nono. Dalili kuwa shi ne, hulba na sanya fata da tsokar da ke kewaye da nonon mace budewa, hakan na sa nonon ya ciko bulbul ya zama abin sha’awa, musamman idan nonon ya kasance da girmansa; amma ya kwanta.
Abubuwan da ake bukata su ne; garin hulba da garin shammar da kuma zuma.
Yadda za a hada:
Za a samu garin hulba da garin shammar, sa a debi cikin karamin cokali daya; na garin hulbar sai a zuba cikin kofi mai tsafta da aka tanada, sannan a zuba garin shammar, shi ma cikin karamin cokali daya, sai a gauraya su waje guda. Daga nan, sai a dafa ruwa; bayan ya tafasa sai a zuba a kan garin hulbar da na shammar da ke cikin kofin a juya da cokali, bayan nan sai a rufe kofin; idan ya dauki kamar minti 10 sai a tace da rariya a kawo zuma mai kyau a zuba a ciki a sha.
Daga bisani, sai a shafa man hulbar a nonon. A wajen shafawa a kan nonon, a tabbatar an murza man hulbar sosai a kan nonon baki-daya yadda zai shiga fatar nonon da kyau. Za a sha wannan hadi sau biyu a rana, wato da safe da kuma dare; sannan kuma duk lokacin da aka kammala shan shayin, haka nan za a shafa man hulbar a kan nonon, shi ma ya zama sau biyu kenan.
Yadda za ki gane maganin na amfani shi ne, ta hanyar jin nononki na kara nauyi, alamar ya fara cikowa kenan. Allah Ya sa mu dace, amin.
Karin bayani: A inda muka ambaci amfanin hulba ga lafiyarmu, amma ba mu yi bayanin yadda za a yi amfani da ita ba, a nan kenan muna nufin mutum ya yi amfani da kwayoyin hulbar a abinci ko kuma ya rika yin shayinta yana sha.
Idan a shayi mutum yake son amfani da ita, sai ya rika shan kofi daya na shayin sau biyu a kullum, wato da safe da dare.
Discussion about this post