Wani mutum da ya ƙona Al-ƙur’ani a Sweden ya rasa ransa bayan an harbe shi, a cewar rahotanni daga kafofin yaɗa labarai na ƙasar.
An harbe mutumin mai suna Salwan Momika, mai shekara 38, a daren ranar Laraba a cikin wani gida da ke birnin Södertälje.
- Wani Ɗan Pakistan Ya Kashe ‘Yarsa Kan Ɗora Bidiyon Kanta A TikTok
- Isra’ila Ta Dakatar da Sakin Fursunonin Falasɗinawa Duk da Yarjejeniyar Tsagaita Wuta
A shekarar 2023, Mista Momika ya ƙona Al-ƙur’ani a gaban babban masallacin birnin Stockholm, abin da ya jawo zanga-zanga da bore a wasu ƙasashen Musulmi.
Ƴansanda sun tabbatar da kisansa, inda suka ce sun kama mutane biyar da ake zargi da hannu a lamarin.
Rahotanni sun nuna cewa an harbe Momika ne a lokacin da yake watsa bidiyo kai-tsaye a shafukan sada zumunta.
Mista Momika ya yi zanga-zanga da dama da ke nuna ƙin jinin Musulunci, lamarin da ya haddasa bore a ƙasashe da dama.
A lokacin da ya ƙona Al-ƙur’ani, an yi bore a ofishin jakadancin Sweden da ke Bagadaza, inda aka kori jakadan ƙasar daga birnin.
Gwamnatin Sweden ta ce ta ba shi izinin yin zanga-zangar, bisa hujjar cewa yana da ‘yancin faɗar albarkacin baki, kamar yadda dokar ƙasar ta tanada.
