Babu Inda Mayaudara Da Mahassada Suka Taru Kamar Masana’antar Kannywood – Adam Zango

A ci gaba da mayar da zazafan martani da jarumin Kannywood Adam Zango yake yi, ya kuma bayyana cewar akwai tarin mayaudara da mahassada a masana’antar Kannywood.

Zango, ya bayyana haka ne a wani faifan bidiyo da aka wallafa a Facebook, inda yake bayyana yadda da yawa daga cikin abokan sana’arsa suke fatan ganin ya daina fitowa a cikin shirin fim.

• Kalau Nake Babu Abin Da Ke Damun Kwakwalwata – Adam Zango
• Ra’ayoyin Kasashen Duniya Game Da Harin Da Iran Ta Kaddamar A Kan Isra’ila 

“Duk da cewar akwai da yawa daga cikinmu a masana’antar wadanda suke da halaye nagari amma wadanda suke da halin mugunta da hassada sun fi yawa,” in ji Zango.

“Saboda haka nan bada jimawa ba mai yiwuwa ne a nemeni a rasa a Kannywood domin kuwa zan koma wata sana’a wadda ba fim ba saboda na zauna lafiya kalau tare da iyalina da kuma ‘yan uwa da abokan arziki,” in ji shi.