Kamar yadda aka sani ne, cutar Sankarau ta fi yaduwa a irin wannan lokaci na zafi, sannan kuma akwai abubuwa da dama da ke haddasa ta.
Masana ilimin kimiyya, sun kasa wannan kwayar cuta zuwa gida biyu; akwai Sankarau mai dauke da kwayar cutar Bakteriya, akwai kuma mai dauke da kwayar cutar Bairos.
Don haka, mai dauke da kwayar cutar Bairos; ita ce cutar Sankarau mafi hadari, domin kuwa; tana iya yin kisa nan take ko cikin kankanin lokaci, musamman idan ba a samu kulawar gaggawa ba. Kazalika, nau’ikan kwayoyin Bakteriyar da ke haddasa wannan cuta, na haifar da guba a cikin jini, sannan kuma su yada ta zuwa sassan jikin Dan’adam baki-daya.
Sai kuma mai dauke da kwayar cutar Bairos, wadda ta fi yawa cikin nau’ikan cutar ta Sankarau, sai dai kuma, ita ce wadda ta fi rashin hatsari a cikinsu. Duk da cewa, tana sanya mutum cikin hali na rashin lafiya, amma ba ta cika yin kisa ba.
Har ila yau, ya kyautu a lura cewa; wannan cuta ta Sankarau, za ta iya kama kowa, duk da dai ta fi kama yara kanana. Sai dai, manyan mutane masu fama da cutar da kan shafi garkuwar jiki, kamar masu fama da cutar Kansa, na cikin hatsarin kamuwa da wannan cuta kwarai da gaske.
Bugu da kari, kwayoyin cutar da ke haddasa cutar Sankarau na yaduwa ne daga mutum zuwa mutum, ta hanyar kusanci ko hada jiki ko kuma ta hanyar tari ko atishawa ko sumbata ko kuma cin abinci da cokali guda.
Haka zalika, wasu mutanen na iya yada cutar ba tare da sun san suna dauke da ita ba, akasarin mutanen da ke dauke da ita; ba su ma sani ba.
Matsalar a nan ita ce, wadanda ke dauke da cutar ba tare da sun sani ba, na iya yada ta ga sauran mutane; musamman masu rauni, kamar kananan yara da kuma tsofaffi.
Wannan dalili ne yasa yara dalibai, wadanda ke karatu a makarantu masu cunkoso ke saurin kamuwa tare da yada cutar cikin kankanin lokaci.
Alamomin Kamuwa Da Cutar Sankarau
Duk da cewa, akwai nau’ikan cutar Sankarau iri daban-daban, akwai kuwa wasu alamomin da za a iya lura da su ta hanyar gane cewa, mutum ya kamu da cutar kamar haka:
Zazzabi
Amai da gudawa
Ciwon kai mai tsanani
Rashin son haske
Taurin wuya
Dimaucewa
Fita daga hayyaci
Shidewa
Fitowar kuraje
Har ila yau, akwai kuma karin wasu alamomin da ya kamata a lura da su, musamman ga yara kanana kamar haka:
Rashin cin abinci
Kumburi mai tashi a kai
Rashin kuzari
Taurin jiki
Saboda haka, kamar yadda masana suka bayyana; da zarar an ga ire-iren wadannan alamomi, sai a hanzarta zuwa asibiti ba tare da wani bata lokaci ba. Sannan kuma, ba dole ne sai an jira an ga dukkanin wadannan alamomi da aka jero a sama ba, kafin a garzaya zuwa asibiti.
Hanyoyin Kare Kai Daga Wannan Cuta Ta Sankarau
Babbar hanyar kariya daga wannan cuta ta Sankarau ita ce, Rigakafi. Sanin kowa ne, gwamnatoci da dama na samar da Rigakafin Cutar Sanƙarau kyauta a asibitoci daban-daban, wadanda ake sakawa cikin jerin alluran rigakafi na wajibi lokaci zuwa lokaci.
Kazalika, sauran matakan kariya daga cutar sun hada da:
Tsafta
Bude tagogi
Kauce wa cunkoso a cikin dakuna da dai sauran makamantansu.
Saboda haka, jama’a ya zama wajibi a kula tare da sanya lura dangane da wannan cuta kwarai da gaske, musamman ganin yadda ta fi yin illa da tasiri a irin wannan lokaci na tsananin zafi.
Discussion about this post