dan takarar mataimakin shugaban kasa na jam’iyyar NDC, kuma tsohon Gwamnan Jihar Kano, Sanata Rabiu Musa Kwankwaso, ya bayyana aniyarsa ta sulhuntawa da Gwamna Abba Kabir Yusuf.
A cewar kamfanin dillancin labarai na Nijeriya (NAN), Kwankwaso ya bayyana hakan ne a wata hira da da ya yi da sashen Hausa na BBC da aka wallafa a ranar Lahadin da ta gabata, inda ya yi tsokaci a kan batutuwan da suka shafi rashin jituwa tsakaninsa da gwamnan na Kano.
Gwamna Yusuf, wanda ya lashe zaben 2023 a karkashin jam’iyyar NNPP, a da ya kasance mai matukar biyayya da goyon bayan tafiyar Kwankwasiyya, wato kungiyar magoya bayan Kwankwaso.
Sai dai, dangantakar tasu ta samu tangarda bayan da gwamnan ya sauya sheka zuwa jam’iyyar APC, inda ya shiga bisa jagorancin tsohon Gwamnan Kano, Dakta Abdullahi Ganduje, wanda ake kallon sa a matsayin babban abokin hamayyar siyasar Kwankwaso a jihar.
A yayin hirar da BBC ta yi da shi, Kwankwaso ya ce; har yanzu yana matukar kaunar Gwamna Yusuf, kuma yana iya sulhuntawa da shi, idan har shi ma yana da bukatar hakan.
“Ban yi watsi da shi ba, ban ce ya tafi ko kuma na kore shi ba; har yanzu ina son sa,” in ji shi.
Kwankwaso ya kara da cewa, shi ba mutum ne mai daukar fansa ba, sannan kuma a kodayaushe, yana yafe wa wadanda suka yi masa laifi.
Har ila yau, ya ce; ya yafe wa Ganduje, duk da irin munanan abubuwan da ya yi masa a baya.
“Sau nawa muka samu sabani da Ganduje? Ya kalubalance ni a lokuta daban-daban.
“A shekarar 2007, lokacin da muke Ma’aikatar Tsaro, shi ne mataimakina na musamman, amma sun yi tarurruka domin ganin bayana, saboda na kalubalance su.
“Duk da wadannan matsaloli, a haka na tsayar da Ganduje kuma na goyi bayansa, amma a karshe ya butulce min,” in ji Kwankwaso.
Shugaba a jam’iyyar ta NDC ya ce, ba ya tilasta wa mutane ko fada musu abin da za su yi, inda ya kara da cewa; har yanzu yana cikin harkokin siyasa, sannan kuma ba irin ‘yan siyasar da ke zama a gefe suna kallon abubuwa kawai ba ne.
“Ni ba Allah ba ne. Saboda haka, idan Abba Kabir Yusuf ko wani daban yana son shigowa, dole ne ya kasance mai hakuri, mai faffadan tunani da tausayi, domin ba kowa ne zai bi tsarin da kake so ba.
“Ba za ka yi tsammanin cewa, sai kowa ya yi aiki ko ya nuna hali ko kuma ya yi tunani kamar yadda kake yi ko kake so ba, domin kowane mutum yana da nasa salon tunanin, shekaru, asali da kuma matakin ilimi.
“Don haka, da a ce ba ni da hali na yin afuwa, da ba mu tsayar da Ganduje takara ba; haka ma lamarin yake ga Abba Yusuf.
“Ba ma karbar ko sisi daga wurinsu, domin ba su goyon bayanmu ko tikitin takara; sannan kuma ba ma sayar da takararmu,” in ji Kwankwaso.
Bayan wadannan furuci na Kwankwaso ne, sai aka jiyo gwamnatin Jihar Kano, na bayyana cewa; kofarta a bude take, domin yin sulhu da Kwankwason, wanda hakan ya bayar da dama ko bude kofar cece-kuce a tsakanin al’umma, musamman wadanda tun a farko rikicin na Kwankwaso da Abba, suke kallon al’amarin a matsayin wani sabon salon wasan kwaikwayo.
Domin kuwa a ganinsu, shugabannin biyu (Kwankwaso da Abba), bakinsu hade yake, illa kawai suna yawo da hankalin mabiyansu ne, don cimma wasu burikansu na siyasa.
Idan aka yi la’akari da wannan hira da Kwankwaso ya yi da kuma yadda Gwamnatin Jihar Kanon ta yi saurin mayar da martini, za a iya tabbatar da cewa; lallai Biri yana kama
da mutum, kamar yadda mutane suka yi zargi suke kuma ci gaba da fadin albarkacin bakinsu.
A ranar Lahadin Kwankwaso ya bayyana wadannan kalamai ne, wakilinmu ya tattauna da Kwamishinan Yada Labarai da Harkokin Cikin Gida na Jihar Kano, Ibrahim Waiya, inda ya bayyana cewa; gwamnatin jihar a shirye take wajen ganin ta sasanta da tsohon gwamnan, kuma jagoran tafiyar Kwankwasiyya, Sanata Rabiu Musa Kwankwaso.
Waiya ya bayyana hakan ne, inda yake mayar da martani kan kalaman Kwankwason na baya-bayan nan cewa; kofarsa a bude take don sasanta wa da Gwamna Abba Yusuf.
A cikin wata hira da ya yi da BBC Hausa da aka wallafa a shafinsa na sada zumunta, Kwankwaso ya ce; ko kadan bai yi watsi da Gwamna Abba Yusuf ba, sannan kuma bai bukace shi da ya bar tafiyarsa ta siyasa ba.
Har ila yau, ya ce; har yanzu yana kaunar gwamnan, tare da kara da cewa; bambancin ra’ayi na siyasa bai kamata ya zama cikas ga sasanta wa a tsakaninsu ba. Da yake mayar
da martani, Waiya ya kara da ce; gwamnati na kallon tsohon gwamnan a matsayin uba, saboda haka, za ta yi maraba da duk wani yunkuri na dawo da alakar da ke tsakaninsu.
“Ko shakka babu, muna kallon Dakta Rabiu Musa Kwankwaso, a matsayin uba a gare mu. Saboda haka, kamar yadda ya ce; kofarsa a bude take don sasantawa, haka mu ma tamu kofar a bude take,” in ji kwamishinan.
Waiya ya ci gaba da cewa, a baya Gwamna Yusuf ya bukaci magoya bayansa da kada su dauki Kwankwaso a matsayin abokin gaba ko hamayya.
“Bugu da kari, gwamnanmu, mai girma Abba Kabir Yusuf, ya ce; kada mu yi fada da shi (Kwankwaso), domin shi uba ne a gare mu.
“Saboda haka, ba mu da matsala da batun sasantawa da shi, matukar bukatar hakan ta samu. Sannan kuma, a zahiri ba ma fada da shi ko kadan, “Batun kawai ya ta’allaka ne ga bambancin ra’ayi ko siyasa,” in ji shi.
Wadannan kalaman, sun biyo bayan sabanin siyasa da ya shiga tsakanin Gwamna Yusuf da kuma Kwankwaso, bayan da gwamnan ya sauya sheka daga jam’iyyar NNPP zuwa APC.
Yayin da yake tattaunawa a kan dangantakarsa da Yusuf, Kwankwaso ya bayyana cewa; ya yi imanin cewa, za a iya warware sabanin siyasar da ke tsakaninsu ta hanyar yin hakuri, gafara da kuma tausayi, inda ya yi ishara da dangantakar da ta taba kasancewa tsakaninsa da tsohon Gwamna Abdullahi Ganduje.
Har ila yau, tsohon gwamnan ya jaddada cewa; bai kamata shugabannin siyasa su yi tsammanin mabiyansu za su amince da duk wani mataki da suka dauka ba, yana mai nuni da cewa; mutane suna da bambancin asali, gogewa da kuma ra’ayoyi daban-daban.
Yusuf, wanda tsohon abokin siyasa ne, kuma wanda Kwankwaso ya horar a fagen siyasa, ya zama dan takarar gwamna na jam’iyyar NNPP a zaben 2023, tare da goyon bayan tsarin siyasar Kwankwasiyya.
Daga bisani kuma, ya sauya shekarsa zuwa jam’iyyar APC, wanda hakan ya canza yanayin dangantakar siyasarsa da Kwankwaso, tare da sake fasalin yanayin siyasar Jihar Kano gabanin babban zabe mai zuwa na shekarar 2027.
Duk da cewa, Kwankwaso ya nuna aniyarsa ta yin sulhu, amma har yanzu tsakanin shi da Gwamna Abba Kabir Yusuf, ba su sanar da wata matsaya da suka cimma ko yarjejeniya, don dawo da dangantakar tasu ta siyasa ba.
