Mahawararmu ta wannan makon, ta kunshi jin ra’ayoyin masu karatunmu ne, kan jin shin tsakanin talauci da jahilci, wanne ya fi jefa matasanmu cikin mummunar hanya? Kamar kowane mako, SANI ANWAR da MUHAMMAD BAkIR, ne suka tattara ra’ayoyin naku.
Nana Aishatu Kabir Ladan
Jahilci ba wai kawai rashin zuwa makaranta ba ne, ya hada har da rashin fahimtar abin da ya dace, da wanda bai dace ba, da kuma rashin sanin illar wasu shawarwari. Hakan kan sa matashi ya kasa bambance nagartaccen abu da akasin haka, ya zama mai saukin yaudara, ya bi mugayen mutane ko ya shiga ayyukan da bai fahimci illarsu ba. Wasu kuma kan dauki abin da ke cutar da rayuwarsu a matsayin abin alfahari ko hanyar samun nasara.
Saboda haka, ina kira ga iyaye, malamai, gwamnati da sauran al’umma baki-daya, da su bai wa ilimin matasa muhimmiyar kulawa. Domin idan muka ilmantar da matashi daya ko biyu, muna daukar mataki ne wajen gina al’umma baki-daya, domin matasa su ne kashin bayan ci gaban kowace al’umma.
Safiyya Aminu Ibrahim
Talauci yana sa matashi ya ji cewa, dole sai ya samu kudi ko ta halin kaka, daga nan sai wasu su shiga aikata sace-sace, danfara, shaye-shaye da sauran makamantansu.
Har ila yau, talauci yana sa mutum ya gaggauta yanke hukunci ba tare da yin nazari ko tunani ba.
Amma akwai matasa talakawa da yawa, wadanda ba sa shiga mummunar hanya, suna kuma hakura su yi sana’a da karatu, saboda suna da ilimi da tarbiyya a zuciyarsu.
Fateemah Sadeek Ahmad
Jahilci ko rashin ilimi, na iya hana matashi samun ilimin da zai taimaka masa wajen bambance tsakanin halal da haram. Gane hadarin wasu hanyoyi ko samun sana’ar dogaro da kai na nuna cewa; rashin samun ingantaccen ilimi da kwarewa na daga cikin manyan kalubalen matasa a Nijeriya.
Bashir Sabo Nadabo (Baban Yazdan)
A gaskiya, ni ina ganin talauci ya fi jahilci muni. Domin idan mutum yana da ilimi, ko da talauci ya matsa masa, iliminsa na iya taimaka masa wajen sanin abin da ya dace da wanda bai dace ba, ya kuma nemo mafita ta halal. Amma idan talauci ya hadu da jahilci, matsalar kan kara tsanani; mutum na iya fadawa cikin sata, garkuwa da mutane da sauran munanan ayyuka, saboda matsin rayuwa da rashin ilimin da zai taimaka masa ya samu mafita.
Haka kuma, jahilci shi kadai ma wata babbar matsala ce, domin mutum na iya kasa fahimtar gaskiya ko da an yi masa nasiha. Saboda haka, a ganina talauci da jahilci dukkansu suna da hadari, amma haduwarsu ita ce mafi muni. Ai ko Uban Giji ma ya ce; “Mugun ciwo talauci.”
A ganina, jahilci ya fi jefa matasa cikin mummunar hanya. Domin kuwa, yana iya sanya mutum cikin wahala, amma idan matashi yana da ilimi da fahimtar rayuwa, zai iya nemo wa kansa hanya ko mafita daga talauci ta hanyar yin aiki, sana’a ko neman ilimi.
Jahilci kuwa, yana hana mutum sanin abin da yake yi na daidai da abin da ba na daidai ba. Matashi marar ilimi da tarbiyya, zai iya fadawa cikin miyagun dabi’u, kamar shaye-shaye, sata, daba da sauran miyagun laifuka, musamman ma idan abokansa suna rinjayar sa.
Haka kuma, ilimi yana taimaka wa matashi wajen fahimtar muhimmancin aiki, hakuri da bin doka. Duk da cewa, talauci babbar matsala ce, amma jahilci kuma na iya sa mutum ya kasa gane hanyar da za ta fitar da shi daga talauci.
A karshe, ya kamata a bai wa matasa ilimi mai inganci da tarbiyya, tare da samar musu da ayyukan yi, domin zama masu dogaro da kawunansu da kuma amfani ga sauran al’umma baki-daya.
Muhammad Sani
Idan muka yi nazarin al’amura da hankali, jahilci ya fi hadari.
Amma kuma, talauci yana iya zama babban kalubale mai tsanani. Yunwa da rashin dama suna iya tura matashi zuwa ga aikata sata, karya da sauran miyagun laifuka. Amma kuma, talauci ba shi da karfin jefa mutum cikin mummunar rayuwa kamar yadda ake zato. Domin kuwa, mutumin da yake da ilimi da wayewa yana iya fuskantar talauci da kwazo da hankali, kuma yana iya gina hanyarsa ta fita daga ciki.
Jahilci kuwa, yana da wani karfi na musamman, don kuwa yana makantar da hankali tare da hana mutum gane sakamakon ayyukansa. Matashin da ba shi da dabara, kuma bai san yadda ake gina rayuwa mai dorewa ba, yana iya shiga shari’a cikin sauki. Haka kuma, jahilci shi ne yake sa talauci ya dore. Duk mutumin da ya samu ilimi, yana iya fita daga talauci; amma mutumin da yake da kudi, amma ya kasance jahili, yana iya rasa duk abin da yake da shi.
Don haka, idan muka auna biyun, jahilci ya fi jefa matasa cikin mummunar hanya. Talauci kalubale ne; jahilci kuwa hanya ce ta rushewa. Matasan da ke da ilimi, suna da damar gina rayuwarsu komai wuya; amma matasan da ke da jahilci, suna da damar rasa rayuwarsu duk wadatarsu.
Ahmad Bello Hamza
A ganina, jahilci ya fi talauci jefa matasa cikin mummunar hanya, saboda rashin ilimi da wayewa na iya sa matashi ya kasa gane bambancin abin da ya dace da wanda bai dace ba. Jahilci na iya hana shi fahimtar damar da ke gabansa, ya kuma sa ya zama mai saukin tasiri daga abokai ko wasu mutane.
Talauci kuwa, yana iya tilasta matashi fuskantar matsaloli, amma ilimi da wayewa na iya taimaka masa wajen nemo hanyar fita daga wannan hali. Saboda haka, yaki da jahilci yana daga cikin muhimman hanyoyin kare matasa daga shiga mummunar hanya.
Mahadi Isa Waziri
Jahilci, saboda shi ne yake sa mutum yayi abu ba tare da tunanin me zai je ya zo ba. Idan mutum yana da ilimi, kuma yana aiki da shi, rashin abin hannu ko talauci ba zai sa ya yi abin da bai kamata ba.
Yana da wahala ka ga abin mai ilimin da yake aiki da shi ya shiga wani hali na aikata abin da bai dace ba, saboda talauci. Ta yiwu za a iya samu, amma ‘yan kalilan ne.
Yusuf Usama Muhammad
A gaskiya jahilci ya fi jefa matasa cikin mummunan hali, kai ba ma matasa kadai ba, har da sauran al’umma baki-daya. Idan ka duba, yanzu mafi akasarin matsololin da muke fama da su, ummul aba isin su shi ne jahilci, kamar su shaye-shaye, daba, bangar siyasa, fyade, ‘yan bindiga da dai sauransu, wanda da a ce akwai ilimi, da abubuwa da dama ba za su yi muni haka ba, hatta shi kansa talauci, idan akwai ilimi ba zai yi kamari. Saboda haka, ilimi shi ne rayuwa da kuma mafita a dukkanin bangarori, kamar zamantakewa, addini, kasuwanci da sauran makamantansu.
