Darajar Hajojin Da Aka Fitar Waje Daga Birnin Shanghai Ta Kai Yuan Biliyan 629 Cikin Watanni Hudu Na Farkon Shekarar Bana

Hukumar kwastam ta birnin Shanghai ta bayyana cewa, cikin watanni hudu na farkon shekarar bana, darajar hajojin shige da fice na birnin ta kai Yuan triliyan daya da biliyan dari hudu, kwatankwacin dallar Amurka biliyan 194.803, adadin da ya karu da kaso daya bisa dari idan aka kwatanta da na makamancin lokacin bara. 

A cikin wannan adadi, darajar hajojin da aka fitar zuwa kasashen waje daga birnin na Shanghai ta kai Yuan biliyan 629 da miliyan 20, wato sama da dallar Amurka biliyan 87 da miliyan 524, adadin da ya karu da kaso 13.8 bisa dari, idan aka kwatanta da na makamancin lokacin bara.

• Babban Sauyi Da Ba a Taba Ganin Irinsa Ba a Karni Guda: Alkiblar Da Sin Take Bi Wajen Samun Bunkasuwa 
• ‘Yansanda Sun Kama Mutane 2 Da Makamai Masu Yawa A Jihar Nasarawa

A tsakanin watan Jainaru zuwa watan Afrilun dai, adadin motocin lantarki da aka fita daga birnin Shanghai ya kai kaso daya bisa biyar na dukkan motocin lantarki da aka fita zuwa kasashen waje daga kasar Sin.

Kazalika, huldar cinikayya a tsakanin birnin Shanghai da yankunan dake tsakiyar Asiya, da Gabas ta Tsakiya, da kuma gabashin Asiya na ci gaba da kyautatuwa, inda saurin karuwar musayar ciniki a tsakaninsu ya kai kaso 20 bisa dari.

Haka kuma, kwanan baya, hukumar kwastam ta birnin Shanghai ta fidda wasu matakan samar da saukin gudanar da harkokin cinikin waje, domin raya cinikin waje ta hanyoyi da dama, kamar samar da sauki ga aikin fitar da manyan hajoji zuwa ketare, da kyautata aikin bincike da sa ido, da kuma kara saurin zirga-zirgar hajoji a tsakanin birnin Shanghai da kasashen ketare. (Mai Fassara: Maryam Yang)