ECOWAS Ta Kaddamar da Dakarun Yaƙi da Ta’addanci

Ƙungiyar Raya Tattalin Arzikin Ƙasashen Yammacin Afirka (ECOWAS) ta ƙaddamar da wata runduna mai dakaru 5,000 domin yaƙi da ta’addanci da sauran laifuka a yankin.

Ministan Tsaron Nijeriya, Mohammed Badaru Abubakar, ne ya bayyana haka a taron hafsoshin tsaro karo na 43 da aka gudanar a Abuja.

• Gwamna Buni Ya Naɗa Matasa 200 A Matsayin Hadimansa
• Cutar Sanƙarau Ta Kashe Mutum 26, 248 Sun Kamu A Kebbi

Taron ya samu halartar manyan hafsoshin tsaro daga ƙasashen ECOWAS, ban da Mali, Burkina Faso da Nijar, waɗanda suka fice daga ƙungiyar a hukumance a ranar 29 ga Janairu, 2025.

A cewar Badaru, kafa wannan runduna yana da nufin tabbatar da zaman lafiya da tsaro a yankin, tare da amfani da kwarewa, kayan aiki, da sadaukarwa domin cimma nasara.

“Ina mai farin cikin sanar da fara aikin wannan runduna domin yaƙi da ta’addanci a yankin,” in ji shi.

Ya ƙara da cewa, ECOWAS na da aniyar tunkarar matsalolin tsaro don tabbatar da zaman lafiya da wadata ga al’ummomin ƙasashen yankin.