Jama’a da dama da ke arewacin jihar Yobe, su na ci gaba da bayyana fargar yadda gwamnatin jihar Yobe hadi da yan siyasar yankin ke ci gaba da jan kafa wajen gudanar da ingantaccen binciken da zai kai ga gano hakikanin abubuwan da ke jawo yawaitar kamuwa da cutar koda a yankin, matsalar da dadewa ta yi sanadiyyar mutuwar daruruwan jama’a, yayin da wasu da dama ke ci gaba da fama da matsalar.
Har wala yau, wannan yanki shi ne shiyyar da shugaban majklisar dattawan tarayyar Nijeriya; Sanata Dr. Ahmad Ibrahim Lawan ke wakilta, sama da shekara 20. Wanda a kan idon sa al’amarin ci gaba da lakume rayukan jama’ar da su ka zabe shi, ba tare da daukar kwakkwaran matakin da ya dace ba, face kawai daukar alkawurra. Sannaan wani babban abin damuwa, bai tabuka abin azo a gani ba wajen rage wa masu fama da cutar wahalhalun ta ba.
Matsalar cutar koda a yankin ta zama ruwan dare, wadda ta ratsa gida-gida a yankin; inda a gida daya za ka tarar da mutum uku dauke da ita ko kuma sun mutu ta dalilin ta. Cuta ce wadda ta jefa jama’a da dama cikin halin kaka-nikayi matsalar da har yanzu ta na ci gaba da addabar jama’a, daruruwan maras lafiya ne ke rayuwa a mawuyacin halin famar jinyar cutar baya ga halin matsin rayuwar yau da kullum wajen jinyarta.
Binciken farko ya nuna yankin ne ya fi sauran yankunan jihar fama da lalurar cutar kodar, musamman kananan hukumomin Jakusko, Bade, Karasuwa da Nguru, a matsayin wadanda su ka fi kasancewa cikin barazanar wannan cutar, wadda har yanzu babu kwakkwaran binciken da ya tabbatar da hakikanin me ke haddasa matsalar ba.
Dukta Musa Abubakar, kwararren likita ne kana kuma shugaban asibitin gwamnatin tarayya (FMC) a Nguru da ke jihar Yobe, ya bayyana cewa mazauna arewacin jihar Yobe su ne ke kan gaba wajen barazanar kamuwa da cutar koda a arewa maso-gabas.
Dukta Musa ya kara da cewa, har yanzu bincike bai basu hakikanin inda matsalar take ba, abin ta ruwan sha ne ko a yanayin kasa ne ko wasu daga nau’in kayan abbincin da ake amfani da su a yankin, “Wannan al’amari ne mai matukar girma kuma wanda akwai bukatar gwamnatin jihar Yobe da tarayya su hada hannu wajen gudanar da kawakkwaran binciken yadda al’amarin yake tare da kokarin dakile shi. Sannan babbar matsalar ita ce yadda cutar ke ci gaba da shafar masu karamin karfi da matsakaita”.
“Saboda idan ka lura, ba abu ne mai sauki ga mai karamin karfi ya iya daukar nauyin kan sa ta fannin jinyar cutar koda, to balle kuma ayi maganar dashen ta- wannan ma ace ka samu wanda zai baka kyautar kodar sa. Wannan abu ne wanda ya dace ace gwamnatin jihar Yobe tare da hadi da yan siyasar wannan yankin sun tashi tsaye a kan kari wajen shawo kan al’amarin.”
A hannu guda kuma, wani binciken da cibiyar kula da masu fama da cutar koda ta asibitin koyarwar jami’ar Maiduguri (UMTH) ta gudanar a shekarun baya ya nuna yadda mafi yawan masu dauke da cutar a jihar, wadanda ke zuwa ganin likitoci a cibiyar, sun fito ne daga wannan yanki, a jihar Yobe.
Sakamakon binciken ya na kunshe ne a cikin wani rahoton da shugaban cibiyar ya jagoranta ya fitar- Farfesa Ibrahim Ummate, likitan tuntuba (consultant physician) kuma kwararren masani a fannin cutukan koda (nephrologis); na asibitin koyarwar jami’ar Maidugur (UMTH) a jihar Borno, wanda ya nuna cewa, majinyatan da dama ne daga yankin ke zuwa wankin koda a cibiyar. Ya ce kuma mafi yawan masu zuwa daga jihar sun fito ne daga wannan yankin.
Farfesa Ummate ya bayyana takaicin halin ko-in-kula da mahukuntan jihar Yobe tare da yan siyasar yankin ke nuna wa wajen jan-kafar gudanar da sahihin binciken abubuwan da ke da nasaba da faruwar matsalar cutar kodar. Ya ce har yanzu cibiyar bata gudanar da wani binciken kwakwab ba, wajen gano hakikanin abinda ke haifar da matsalar a yankin ba, ya ce su na kokari kan hakan.
Ya ce a kwarya-kwaryar binciken da su ka gudanar a shekarun baya- a matakin farko, sun yi kokarin fahimtar shin ko akwai matsalar hawan-jini tattare da al’ummar yankin, amma sai suka fahimci cewa babu.
Abu na biyu kuma, cutar koda bata daga cikin cutukan da mutanen yankin su ka gada iyaye da kakkani. Amma a karshe, sun yi hasashen cewa kila matsalar ta na da alaka da ruwan da jama’ar yankin ke amfani dasu a yankin. Binciken da wasu masana su ka yi watsi dashi.
Farfesan ya ce, wani bincike ya nuna yadda masu dauke da cutar ke da saurin gajiya dangane da komai kankantar aiki, ya ce wannan ke nuna ba zasu iya jimirin aiwatar da aiki mai yawa cikin sauki ba, irin yadda su ka saba a lokacin da suke lafiya ba. Kuma wannan yana faruwa ne ta dalilin yadda adadin jinin su ke raguwa. Misali, koda tafiya ta yar karamar tazara, tana yi musu wahala.
Duk da hakan, cibiyar ta bai wa jama’a shawarwarin da cibiyar ta bayar shi ne, ayi kokarin dakile cutar kafin ta kama mutum, shi ne mafi a’ala wajen yakarta fiye da magance ta bayan ta shiga jiki. Wannan shi muke kira matakin farko wajen taka mata burki. Amma idan cutar ta riga ta shiga jikin majinyaci, to wannan shi ne mataki na biyu kuma ciki muke kokarin kawar da matsalolin da ta haifar na shafar wani bangare muhimmi a jiki tare da kokarin kawar da abubuwan da zata iya shafa nan gaba.
Shugaban cibiyar, ya ce bisa ga hakan sun sha rubuta wasikun daukar matakan gaggawa zuwa ga gwamnatin jihar Yobe (Gwamna Gaidam), manyan yan siyasar yankin hadi da masarautar Bade, wajen neman cikakken goyon baya domin gudanar da binciken da zai kai ga gano hakikanin matsalar, ya ce amma shuru.
