Ƙungiyar ƙwallon ƙafa ta Kano Pillars da takwararta ta Enyimba International sun tashi canjaras 0-0 ba tare da an jefa ƙwallo a raga ba, a wasan mako na shida na gasar Firimiyar Nijeriya (NPFL) da aka fafata a Filin Wasa na Sani Abacha da ke Ƙofar Mata a Birnin Kano.
Ƙungiyoyin biyu sun shiga fafatawar ne da burin samun nasara mai muhimmanci, inda Enyimba ta ziyarci Kano da fatan samun maki uku domin barin ƙasan teburin gasar, yayin da Pillars kuma ke fatan samun nasara domin haurawa zuwa matsayi na biyu, sai dai dukkaninsu sun gaza cimma wannan buri.
A yayin da ake tsaka da fafatawa a minti na 56 da fara wasan, alƙalin wasa ya dakatar da karawar na ɗan lokaci sakamakon wata iska mai ƙarfi da ta taso, kafin daga bisani aka ci gaba da taka leda bayan kusan mintuna 10 da lafawar iskar.
Wannan sakamako ya sa Kano Pillars ta ci gaba da zama a matsayi na shida a kan teburin gasar da maki tara a wasanni biyar da ta buga, yayin da Enyimba ta ci gaba da maƙalewa a matsayi na ƙarshe da maki ɗaya kacal.
A wasanninsu na gaba, Kano Pillars za ta karɓi baƙuncin Sporting Lagos a ranar Talata, 6 ga watan Oktoba, yayin da Enyimba za ta karɓi baƙuncin Shooting Stars ta Ibadan a filin wasa na Enyimba International a ranar Laraba, 30 ga watan Oktoba.
