Ministan Sufurin Jirgin Sama, Sanata Hadi Sirika, ya bai Hukumar Binciken Tsaro (NSIB) umarni gaggauta bincike game da hatsarin da ya auku tsakanin jirgin kasa da wata motar daukar ma’aikata ranar Alhamis a Legas.
Sirika ya bayyana hatsarin, wanda ya ya yi ajalin mutum shida da jikkatar wasu 79, a matsayin abin tashin hankali, tare da bai wa al’umma tabbacin hukumar NSIB za ta binciko musabbabinsa don kiyaye aukuwar hakan a gaba.
- Mutum 14 Sun Jikkata Yayin Da Magoya PDP Da APC Suka Yi Arangama A Bauchi
- Babban Mai Tattara Sakamakon Zaben Atiku A Ogun Ya Sauya Sheka Zuwa APC
Cikin sanarwar da ya fitar ta bakin hadiminsa, Dokta James Odaudu, ministan ya bukaci hadin kan al’umma don cimma nasarar binciken da za a gudanar.
Daga nan, Sirika ya jajanta wa gwamnati da ma al’ummar Jihar Legas dangane da hatsarin, musamman ga wadanda suka rasa ’yan uwansu a iftila’in.
Rahotanni daga yankin sun ce mutum uku sun riga mu gidan gaskiya, sannan da dama sun jikkata sakamakon hatsarin.
