Hukumar kula da kayayyakin tarihi ta kasar Sin ta fitar da sabbin sakamako 3 na ayyukan binciken kayan tarihi a kasashen waje a birnin Beijing, yau Alhamis 24 ga wata, wadanda suka hada da binciken kayan tarihi na haikalin Montu da Sin da Masar suka gudanar tare, da binciken kayan tarihi na dajin Ben Arous da Sin da Tunisia suka yi cikin hadin gwiwa, da kuma binciken kayan tarihi na kogin ja da Sin da Kyrgyzstan suka gudanar tare.
Daga cikinsu, tarihin haikalin Montu na Masar ya wuce shekaru 3,000. Kwanan nan, tawagar binciken kayan tarihi ta hadin gwiwar Sin da Masar ta gano wani “tabki mai tsarki a kudancin haikalin” wanda ba a san da shi ba a baya, da fadinsa ya wuce murabba’in mita 50, abun ke da ma’ana mai zurfi ga nazarin al’adun ibada da ayyukan haikalin Masar na zamanin da, kuma ya nuna darajar tunani da hanyoyin binciken kayan tarihi na Sin a duniya.
Dajin Ben Arous na Tunisia kuwa, ya kasance daga karni na 3 kafin haihuwar Annabi Isa zuwa karni na 8 bayan haihuwar Annabi Isa. A can, tawagar binciken kayan tarihi ta hadin gwiwar Sin da Tunisia ta gina wani lambun shan iska na kayan tarihi, inda ta yada dabarun kare manyan wuraren tarihi na Sin zuwa kasashen waje, kuma ta taimaka wa al’ummar Tunisia kara fahimtar tarihinta.(Amina Xu)
