Ƙungiyoyin ƙwallon ƙafa na Katsina United da Plateau United sun tashi kunnen doki da ci 2-2 a wasan mako na 10 na gasar EuroMatch NPFL ta Nijeriya, wanda aka buga a filin wasa na Muhammad Dikko da ke birnin Katsina a ranar Asabar.
Plateau United ce ta fara cin ƙwallo a minti na 30, bayan da Dawa Victor ya zura ƙwallo ta hanyar bugun kusurwa.
Ƙungiyar ta ƙara ta biyu a minti na 81 ta hannun Jibril Ibrahim, lamarin da ya sa ta kusan samun nasara.
Sai dai Katsina United ta nuna ƙwazo wajen neman dawowa wasan, inda Armiya’u Yusha’u ya farke ƙwallo ɗaya bayan minti guda kacal.
Daga bisani, Umar Rabiu ya zura ƙwallo ta biyu a ƙarshen wasan, inda ya taimaka wa Katsina United ta tsira daga rashin nasara a gidanta.
Wannan sakamako ya sa Plateau United ta ci gaba da zama a matsayi na uku a teburin gasar da maki 15 bayan wasanni 10, yayin da Katsina United ta koma matsayi na tara da maki 13 bayan wasanni 10.
A wasanninsu na gaba, Plateau United za ta karɓi baƙuncin Warri Wolves a ranar 1 ga watan Nuwamba, yayin da Katsina United za ta karɓi baƙuncin Sporting Lagos ta Ibadan a filin wasa na Muhammad Dikko da ke Katsina.
