Jami’an Tsaro Sun Cafke Mutumin Da Ake Zargi Da Laifin Hada Bama-Bamai A Jihar Taraba

‘Yan sanda a Jihar Taraba sun yi ram da wani mutumin da dubunsa ta cika Bayan gano shi da laifin hada bama-bamai a Nijeriya.

An kama mutumin ne a garin Tella da ke karamar hukumar Gassol ta jihar a ranar Laraba.

• Gobara Ta Kone Shaguna 42 A Jami’ar ATBU Bauchi

Jaridar Daily Trust ta wallafa cewa an gano wasu kayayyakin hada bama-bamai, an kuma ga wasu bindigogi da harsashensu a gidan mutumin, wanda ya mayar masana’anta. Inji BBC Hausa.

Jami’an sun bayyana cewa, mutumin dan asalin Jihar Zamfara ne.

Kakakin rundunar ‘yan sanda a jihar, DSP Usman Abdullahi ya tabbatar wa jaridar Daily Trust afkuwar lamarin da kama wanda ake tuhumar.