Hukumar tsaro ta farin kaya (DSS) ta kama wani mutum mai suna Moferewa Maiye, bisa zargin yin basaja a matsayin jami’in DSS tare da karɓar kuɗaɗe daga hannun masu ababen hawa a Abuja.
An kama Maiye a maɓoyarsa da ke kusa da NITEL Junction, a kan titin Adetokunbo Ademola, Wuse II, bayan DSS ta samu sahihan bayanan sirri.
A lokacin da aka kama shi, an ce yana sanye da kayan aikin DSS kuma yana ɗauke da bindigar bogi.
Wata majiya ta ce Maiye ya yi amfani da kayan da bindigar bogin wajen tsoratar da masu ababen hawa da karɓar kuɗi a hannunsu.
A lokacin da ake masa tambayoyi, Maiye ya ce kayan DSS ɗin na ɗan uwansa ne, Monday Maiye da rasu, wanda jami’in DSS kafin rasuwarsa shekaru da dama da suka gabata.
DSS na gudanar da bincike kan yadda wanda ake zargin ya samu kayan da sauran kayayyakin aiki, da kuma tsawon lokacin da ya shafe yana aikata wannan laifi.
A halin yanzu, Maiye na hannun DSS yayin da ake ci gaba da bincike.
