Ya zuwa yanzu, jimillar kudin shiga na fina-finan kasar Sin na shekara ta 2026, ciki har da sayar da tikiti kafin lokaci, ya wuce Yuan biliyan 25 bisa ga bayanan yanar gizo, kuma kudin shiga na kowace rana ya ci gaba da wuce Yuan miliyan 100 a tsawon kwanaki 34 a jere, yayin hutun lokacin zafi na bana a kasar, kana yawan masu kallo ya wuce miliyan 630, kuma yawan fina-finan da aka nuna sun zarta sau miliyan 93.74.
Fim din “Once upon a Time in the Middle East” da ake nunawa a duk fadin kasar Sin tun daga ranar 11 ga watan Agustan nan ya samu karbuwa tun daga farko, inda jimillar kudin shigarsa ya wuce Yuan miliyan 460, kuma bayan sa’o’i 15 kacal da fara nuna shi, yawan masu kallo ya wuce miliyan 7, kuma yawan kudin shiga da karbuwarsa na ci gaba da karuwa tare.
Kasuwar fina-finai a nan kasar Sin na ci gaba da karuwa, inda yankuna daban-daban suke fitar da matakan samarwa al’umma kudaden rangwame na kallon fim ta hanyoyi daban-daban. A lardin Hainan, gwamnati ta gabatar da takardun tallafin kudin sayen tikitin fina-finai har Yuan miliyan 5 bisa matakai daban daban, wanda ya shafi gidajen sinima sama da 100 a duk fadin yankin. Ban da wannan, mazauna da masu yawon shakatawa za su samu rangwame wajen sayayya da zirga-zirga bisa tikitin fim. (Amina Xu)
