Inter Milan da kocinta Simone Inzaghi sun raba gari ta hanyar yarjejeniya, kwanaki uku bayan da Paris St-Germain (PSG) ta doke su a gasar cin kofin zakarun Turai. Inzaghi mai shekaru 49, wanda kulob din Serie A din ya nada a shekarar 2021, yana da alaka mai karfi tsakaninshi da kungiyar Al-Hilal ta kasar Saudiyya.
“Lokaci ya yi da zan yi bankwana da wannan kulob bayan aikin shekaru hudu, inda na ba da komai domin samun nasararta,” in ji Inzaghi wanda ya lashe kofuna shida a Inter.
- ‘Yansanda A Kano Sun Gargaɗi Sarki Sanusi II Kan Fitowa Hawan Sallah
- Yanzu-yanzu: JUSUN Ta Dakatar Da Yajin Aikin Da Fara A Faɗin Ƙasa Baki Ɗaya
“Ina so in furta kalma daya ta karshe ga miliyoyin magoya bayan Nerazzurri (Inter) wadanda suka taya ni murna a lokacin nasara, hakazalika suka taya ni kuka a lokuta masu wahala kuma suka yi dariya da murna a kofuna shida da muka samu tare”.
Sanarwar tafiyar tasa ta biyo bayan ganawar da Inzaghi ya yi da jami’an Inter a ranar Talata, sanarwar da Inter Milan ta fitar ta ce Kulob din da Simone Inzaghi sun yanke shawarar rabuwa, “Wannan shi ne shawarar da aka dauka bisa yarjejeniyar juna”, shugaban Inter Giuseppe Marotta ya kara da cewa “Ina so in gode wa Simone Inzaghi saboda aikin da ya yi, ya matukar taka rawar gani a shekaru 4 da muka shafe muna aiki tare, don haka Inter Milan na yi mashi fatan alheri a duk inda zai samu kanshi a nan gaba”.
Inzaghi ya lashe gasar Seria A daya, Coppa Italia biyu da kuma Supercoppa Italia sau uku a lokacin da ya ke San Siro, sau biyu ya jagoranci Inter zuwa wasan karshe na gasar zakarun Turai amma Manchester City ta doke su da ci 1-0 a 2022-23 sannan suka sha kashi a hannun PSG da ci 5-0 a ranar Asabar din da ta gabata.
Sun kuma kasa cin kofin Seria A na 2024-25 bayan da Napoli ta basu maki daya kacal akan teburi, tafiyar Inzaghi na zuwa ne gabanin halartar Inter a gasar cin kofin duniya na kungiyoyin kwallon kafa na Fifa da aka fadada, wanda zai gudana a Amurka tsakanin 14 ga watan Yuni zuwa 13 ga Yuli.
