Rundunar ‘yansandan jihar Kano ta sake jaddada haramta duk wani nau’in hawa a yayin bikin Sallar layya da ke gabatowa. Rundunar ta nanata haramcin ne sa’o’i kadan bayan Sarkin Kano na 16 Muhammadu Sanusi, ya umurci dukkan hakimai da ke karkashin masarautar Kano da su yi taro a birnin Kano domin gudanar da bikin na shekara-shekara.
LEADERSHIP ta rahoto cewa, a ranar Talata ne Majalisar Masarautar ta fitar da wata takarda inda ta umurci hakimai da dagatai da su zo da dawakansu da mahaya a ranar Laraba, 4 ga watan Yuni, a shirye-shiryen gudanar da bukukuwan hawan Sallah da ake sa rai. Majalisar ta kuma shirya wani taro a ranar Alhamis 5 ga watan Yuni a fadar mai martaba da ke Kofar Kudu domin zaman kammala shirye-shiryen gudanar da taron.
- FRSC Ta Fara Binciken Hatsarin Motar Da Ya Yi Ajalin ’Yan Wasan Kano 22
- Yanzu-yanzu: JUSUN Ta Dakatar Da Yajin Aikin Da Fara A Faɗin Ƙasa Baki Ɗaya
Sai dai wata sanarwar manema labarai da rundunar ‘yansandan jihar Kano ta fitar, sa’o’i kadan bayan masarautar Kano ta sanar da tsare-tsarenta, ta sake nanata cewa, dokar hana duk wani nau’in hawan Sallah, wacce ta fara aiwatar da ita a lokacin bikin Sallar Azumi da ta gabata, tana nan kuma za ta ci gaba da wanzuwa har a lokacin bikin Sallar layya ta bana.
“Saboda haka, rundunar ‘yansandan ta nanata cewa, dokar hana duk wani nau’in hawan Sallah a jihar yana nan, zai ci gaba da wanzuwa har zuwa lokacin bukukuwan Sallar Layya ta bana ta 2025 da ake shirin yi domin har yanzu, akwai barazanar tsaro mai karfi a jihar.
“An yanke wannan shawarar ne bayan tattaunawa da masu ruwa da tsaki a harkar tsaro biyo bayan rahotannin sirri da ke nuni da shirin wasu bata gari da masu daukar nauyinsu na yin amfani da bukukuwan hawan Sallah wajen gurgunta tsaro da zaman lafiya a jihar, kamar yadda aka tabbatar a lokacin Sallar Azumi.” In ji Rundunar
