Kotu Ta Tura Ɗan Tiktok Gidan Yari Kan Shigar Mata Da Kalaman Batsa A Kano

Wata kotu da ke unguwar No-Man’s-Land a Kano, ta bayar da umarnin a tsare wani shahararren ɗan TikTok, Abubakar Kilina, bayan da Hukumar Tace Fina-finai ta Jihar Kano, ta gurfanar da shi gaban kotu.

An gurfanar da Abubakar ne bisa zargin yin shigar mata, da kuma amfani da kalmomin da ba su dace ba a shafukan sada zumunta.

• ‘Yansanda Sun Kama ‘Yan Ƙungiyar Asiri 4, Sun Ƙwato Makamai A Filato
• Babban Sauyi Da Ba a Taba Ganin Irinsa Ba a Karni Guda: Alkiblar Da Sin Take Bi Wajen Samun Bunkasuwa 

Mai magana da yawun hukumar, Abdullahi Sani Sulaiman, ya ce an gurfanar da Kilina a gaban Alƙalin kotun, Hajiya Halima Wali, inda ya amsa laifin da ake tuhumarsa da shi.

Kotun ta bayar da umarnin a tsare shi a gidan gyaran hali har zuwa ranar 17 ga watan Yuni, 2025, ranar da za a yanke hukunci a ƙarshe.

Shugaban Hukumar Tace Fina-finai, Abba El-Mustapha, ya ce hukumar za ta ci gaba da yaƙi da abubuwan da ba su dace ba a shafukan sada zumunta a Jihar Kano.