Kyakkyawan Tunanin Kwankwaso Na Kafa Jami’ar Kimiyya Ta Wudil Ta Zama Alkairi Ga Al’umma – Alhaji Abdukadir

Alhaji Abdulkadir Gambo Dankoli ya bayyana cewa kyakkyawan tunanin Sanata Dakta Rabiu Musa Kwankwaso na kafa jam’iar kimiyya da fasaha ta Aliko Dangote da ke Wudil ta zama alkairi ga al’ummar Jihar Kano baki daya.

Alhaji Abdulkadir ya bayyana hakan ne a lokacin da yake zantawa da ‘yan jarida a yayin karrama Kwankwaso da jami’ar kimiyya da fasaha ta Wudil ta yi. 

• Martanin Kwankwaso Ga Kawu Sumaila Da Sauran Masu Ficewa Daga NNPP
• Majalisar Dokokin Kano Ta Amince A Sauya Sunan Jami’ar KUST Zuwa Sunan Dangote

Ya ce suna alfahari da wannan katafaren taro da tun kafuwar jami’ar ba a taba irin wannan taro wanda mashahuran mutane masu mulki da sarauta da dattawa suka taru don bikin yaye dalibai da karrama muhimman mutane.

Ya ce wannan abin jin dadi ne ga Kwankwaso wanda shi ya samar da wannan jami’a ta kimiyya da fasaha ta Aliko Dangote, saboda kishin talaka.

Alhaji Abdulkadir ya ce suna farin ciki da jin dadi da karramawar da jami’ar ta yi wa Kwankwaso duba da gudummawar da ya bayar na kafa jami’ar wanda ta habaka a halin yanzu.

Ya ce da Kwankwaso bai yi tunanin samar da jami’ar Wudil ba, da wannan alherin ba za a same shi ba, suna gode wa sauran wadanda suke ba da gudummawa wajen habakar wannan jami’ar.

Alhaji Abdukadir ya yi kira ga magoya baya da masu tasowa cewa idan suka sami dama su yi koyi da jagoran Kwankwasiyya, wanda ya kafa jami’o’i guda biyu a Jihar Kano bayan makarantu na gaba da sakandare guda 24 da ya samar da kuma tura dalibai talakawa karatu kasashen waje da mafi yawa sun gama suna amfanar da ci gaban al’umma.