Ɗan wasan bayan ƙungiyar ƙwallon ƙafa ta Arsenal, William Saliba, zai yi jinyar kusan watanni biyar bayan raunin baya da ya ji a wasan kusa da na ƙarshe na Gasar Kofin Duniya, inda Faransa ta sha kashi a hannun Spain da ci 2-0.
A cewar jaridar L’Equipe, wannan rauni babban giɓi ne ga Arsenal, wadda ke fatan kare kambunta na Gasar Firimiyar Ingila.
Saliba mai shekaru 25 ya buga mintuna 30 kacal a wasan kafin ya nemi a maye gurbinsa saboda tsananin ciwon baya.
Ɗan jaridar Faransa, Julien Laurens, ya ce Saliba ya shafe lokaci yana fama da wannan matsala, har ta sa ya kasa buga wasan ƙarshe na rukuni da Faransa ta yi da Norway.
Rahotanni sun ce Saliba ya sanar da jami’an lafiya na Arsenal cewa ciwon bayan ya ƙara tsananta.
Ya taɓa bayyana cewa ya yi ta fama da raunuka yayin da Arsenal ke fafutukar lashe Gasar Firimiya da kuma Gasar Zakarun Turai.
Ana sa ran za a yi wa Saliba tiyata domin magance matsalar.
Ɗan wasan ya taka muhimmiyar rawa wajen taimaka wa Arsenal lashe Gasar Firimiya ta farko cikin shekaru 22 a kakar wasa ta 2025/26, sannan ya kasance ɗaya daga cikin fitattun ‘yan wasan Faransa a Gasar Kofin Duniya ta bana.
