Ɗan takarar gwamnan Jihar Bauchi na jam’iyyar APC a zaɓen shekarar 2027, Muhammad Abdullahi Abubakar (SAN), ya zaɓi tsohon Kwamishinan Ma’aikatar Ayyuka na Musamman da Raya Yankunan Karkara, Hon. Farouk Mustapha, a matsayin abokin takararsa na mataimakin gwamna. Sakataren Tsare-tsare na APC a Jihar Bauchi, Malam Sallau Kafi, ne ya bayyana hakan yayin ganawarsa da manema labarai a Bauchi.
Kafi ya ce jam’iyyar ta riga ta miƙa sunan Farouk Mustapha tare da takardunsa ga Hukumar Zaɓe Mai Zaman Kanta ta Ƙasa (INEC) a matsayin ɗan takarar mataimakin gwamna. A cewarsa, ya dawo ne daga Abuja bayan kammala miƙa takardun, yana mai tabbatar da cewa an kammala dukkan matakan da ake buƙata wajen gabatar da sunan ɗan takarar.
Farouk Mustapha ya yi murabus daga muƙaminsa na Kwamishinan Ma’aikatar Ayyuka na Musamman da Raya Yankunan Karkara ne bayan Gwamna Bala Abdulkadir Mohammed ya umarci duk masu riƙe da muƙaman siyasa da ke da niyyar tsayawa takara a babban zaɓen 2027 da su sauka daga mukamansu kafin ko a ranar 24 ga Afrilu, 2027. Kafin hakan kuma, ya fice daga jam’iyyar APM a cikin wata wasiƙa da ya aika wa shugabannin jam’iyyar a mazaɓar Bakin Kasuwa da ke ƙaramar hukumar Katagum.
Farouk Mustapha ba sabon suna ba ne a siyasar Bauchi. A baya ya taɓa neman tikitin takarar gwamna a ƙarƙashin jam’iyyar APC, sannan ya kasance Darakta Janar na Kwamitin Yaƙin Neman Sake Zaɓen Gwamna Bala Mohammed a zaɓen shekarar 2023 ƙarƙashin jam’iyyar PDP. Zaɓensa a matsayin mataimakin ɗan takarar gwamna na APC na daga cikin muhimman sauye-sauyen siyasa da ke jan hankali gabanin zaɓen shekarar 2027.
