Wasu rahotanni na cewa a ranar Juma’a 25 ga watan nan, hukumar lura da harkokin teku ta Philippines, ta fitar da sabon taswirar sassan teku, wanda ya kunshi wasu tsibirai, da yankuna da suka nutse a teku, dake bangaren yankunan tsibiran Nansha Qundao na Sin, ciki har da Zhongye Dao da Mahuan Dao.
Da yake martani kan hakan a yau Talata 29 ga wata, mai magana da yawun ma’aikatar harkokin wajen kasar Sin Guo Jiakun, ya ce matakin Philippines na yin haramtacciyar mamayar tsibiran, da yankuna da suka nutse a teku a yankin Nansha Qundao, da sunan wai “Rukunin tsibiran Kalayaan”, wanda ya wuce iyakar yankunanta, da ma fitar da wani “Taswirar teku”, wanda ya kunshi wasu tsibirai da yankuna da suka nutse a teku a yankin Nansha Qundao, matakai ne da suka yi matukar keta ikon mulkin yankunan Sin, da ma dokokin MDD, da sauran dokokin kasa da kasa masu nasaba.
Guo Jiakun, ya ce wadannan matakai sun sabawa doka, kuma ba su da wata ma’ana kana batattu ne. Kasar Sin na matukar adawa da su, da ma duk wani mataki da Philippines za ta dauka, wanda zai illata ikon mulkin kai da hakkoki da moriyar kasar Sin. (Saminu Alhassan)
