Sanatan Bauchi ta Kudu, Shehu Umar Buba, na fuskantar sabbin zarge-zargen da ake masa na goyon baya ko alaƙa da ayyukan ƴan bindiga, lamarin da ya sake janyo ce-ce-ku-ce kan matsayinsa da kuma rawar da yake takawa a harkokin tsaro. Sanatan ya musanta zarge-zargen da ake yi masa.
Wata majiya daga DSS ta tabbatar wa jaridar PUNCH cewa hukumar na gudanar da bincike kan zarge-zargen, amma ta ce za a bayyana sakamakon binciken “a lokacin da ya dace”. Wannan na nufin har yanzu babu wata sanarwa ta hukuma da ta tabbatar da cewa Sanata Buba na da hannu cikin ayyukan ‘yan bindiga.
Sabbin zarge-zargen sun kuma sa wasu mutane kiraye-kirayen a gudanar da bincike mai zaman kansa. Tsohon Ministan Matasa da Wasanni, Solomon Dalung, ya buƙaci DSS ta fayyace matsayin binciken, tare da cewa Majalisar Dokoki ta ƙasa na iya yin nata binciken, musamman duba da cewa Buba ya taɓa jagorantar kwamitin Majalisar Dattawa mai kula da tsaron ƙasa da leƙen asiri.
Zarge-zargen da ake yi wa Sanata Buba ba sabon abu ba ne, domin a baya ma an taɓa alaƙanta sunansa da wani fitaccen ɗan bindiga, lamarin da ya janyo musayar kalamai tsakaninsa da Gwamnan Bauchi, Bala Mohammed. Buba ya taɓa bayyana irin waɗannan zarge-zarge a matsayin marasa tushe balle makama.
A halin yanzu, binciken DSS ne zai iya fayyace gaskiyar lamarin, yayin da ake ci gaba da kira da a yi taka-tsantsan wajen ɗaukar zarge-zargen da ba a tabbatar da su a matsayin hujjar aikata laifi ba.
