Jama’a barkammu da sake haduwa da ku a cikin wani sabon shirin namu mai farin jini na Girki Don Mata, wanda a yau za mu bayani kan yadda a ke yin Dambun Kifi.
Ga abubuwan da ya kamata a tanada idan za a hada:
Kifi, Albasa, Kayan kamshi, Man Gyada, Magi, Lemun tsami, Tafarnuwa.
Za mu yanka kifi mu cire dattin cikinsa sai mu wanke da ruwan lemun tsami, sannan mu dora a wuta ya tafasu kada ya dade don ba’a yi wa kifi dahuwa mai yawa sai mu sauke sannan mu cire kai da kayan jiki.
Sannan mu zuba a tirmi mu daka shi tare da albasa za mu daka shi har da attarugu idan muna so, in kuma za mu sa dakakken kayan kamshi da borkono a ciki to ba za mu sa attarugu ba.
Idan mun gama dakawa sai mu sami abin suya mai fadi da dan zurfi sai mu zuba mai, shi ba’a cika wuta, a hankali za’a yi ta juyawa har sai ya soyu yadda ake so.
Idan zai dade a ajiye sai a yi jar suya, idan na kwana biyu ne sai a yi shi ja mai haske.
Sannan a kwashe kada a rufe sai ya huce don kada ya lalace. Shi ke nan komai ya yi daidai, a ci dadi lafiya.
