Bayan wata daya da masu garkuwa da mutane suka sako Sadiq daya daga cikin ‘ya’yan Shugaban kungiyar Dattawan Arewa, Farfesa Ango Abdullahi, wasu ‘yan Bindigar sun sake sace wata Surukar Farfesan.
Farfesa Ango ne ya tabbatar da hakan a cikin sanarwar da ya bai wa Jarida Daily Trust a yau Laraba , inda sanarwar ta kara da cewa, ‘yan Bindigar sun kuma yi awon gaba da yara hudu na Suruka ta.
Wata majiya ta ce, an yi garkuwa da su ne a lokacin da ‘yan Bindigar suka kai hari a kauyen Yakawada cikin karamar hukumar Giwa da ke jihar kaduna a daren ranar Talata inda a nan take, ‘yan Bindigar suka afka cikin gidan Dagacin kauyen, Alhaji Rilwanu Saidu.
Masu garkuwar, anan ma sun yi awon gaba da wasu mutane a gidan Dagacin.
Masu garkuwar sun kuma shiga gidan wani makwancin Dagacin kauyen inda suka yi awon gaba da wani mai suna Abubakar Mijinyawa tare da matan auren sa biyu Aisha da Hajara wadanda dukkan su masu shayar wa ne.
Wata majiya ta ce, a lokacin harin, masu garkuwar sun kuma kashe wani mai aikin sintiri mai suna Aminu Lawal
Mutum uku da suka samu raunuka a lokacin harin, an kaisu Asibitin kwararru na Ahmadu Bello da ke a garin Zaria ana duba lafiyarsu.
in ba a manta ba, Sadiq Ango Abdullah, na daya daga cikin sama da Fasinjoji 60 da aka sace a cikin jirgin kasan Abuja zuwa kaduna wanda ‘yan bindiga suka kaima hari a cikin watan Maris wanda daga bisani ya shaki iskar ‘yan ci bayan shafe wata gudu ya na rike a gun masu garkuwar.
