An shirya wa matasa a Jihar Kaduna bita ta kwana daya domin guje wa furta kalaman kiyayya da kuma tayar da zaune-tsaye, yayin da zaɓukan 2027 ke kara ƙaratowa.
Ƙungiyar matasa mai fafutukar wanzar da zaman lafiya (PROCMURA) ta kasa ce ta shirya wa matasa a Kaduna.
Taken taron shi ne, ‘Daƙile furta kalaman ƙiyaiyya da gudunmawar da matasa za su bayar domin guje wa tayar da yamutsi a lokacin zaɓen’.
A jawabinsa, ɗaya daga cikin waɗanda suka shirya taron, Fasto John Joseph, ya ce akwai buƙatar a wayar da kan matasan a yayin da zaɓukan 2027 ke kara ƙaratowa.
A cewarsa, an kafa ƙungiyar ce, musamman domin matasa su rinƙa wanzar da zaman lafiya, tabbatar da fahimtar juna a ƙasar da kuma a Nahiyar Afirka.
Shi kuwa, Dakta Imam Nuraini Ashafa, ya bayyana muhimmancin fahimtar juna a tsakanin mabiya addinin Musulunci da mabiya addinin Kirits a ƙasar, musamman domin a wanzar da zaman lafiya mai ɗorewa.
Haka kuma Malam Joshua, na cibiyar ƙarfafa fahimta a tsakin Musulmai da Kiristoci ya gabatar da ƙasida kan gudumnwar da matasa za su bayar domin daƙile yamutsi a lokacin zaɓuka.
A jawabinsa, Rabaran Dakta Nathan Idrissu Samwini daga ƙasar Kenya, ya jaddada muhimancin zaman lafiya da haɗin kai, domin a gudanar da sahihin zaɓe a ƙasar.
Ya yi nuni da cewa bitar ta zama wajbi, musamman domin a faɗakar da matasan kan illololin wallafa saƙo a shafukan sada zumunta da za su iya tayar da rikici a fadin ƙasar.
Samwini ya kuma yi kira ga iyaye da su ƙara ƙaimi wajen yi wa ‘ya’yansu tarbiyya tare da sanya ido kan ayyukan da suke yi.
Ya gargaɗi matasan ka da su bari ‘yan siyasa marasa kishi su yi amfani da su a lokacin zaɓuka domin cimma manufofinsu na kashin kai.
