Wasu ‘yan bindiga dauke da muggan makamai da suka fito da adadinsu mai yawa sun tare babbar hanyar Gusau zuwa Funtua da ke jihar Zamfara tare da yin awon gaba da matafiya da dama.
Lamarin ya faru ne da yammacin jiya Asabar akan hanyar da ke tsakanin al’ummar Kucheri da Magazu a karamar hukumar Tsafe.
- Yadda Muka Sanya Tinubu Ya Soke Kwangilar Aikin Hanyar Kankara Zuwa Katsina inji Ibrahim Masari
- An Gudanar Da Bikin Mauludi A Karon Farko A Garin Orimerummu
Jami’in hulda da jama’a na rundunar ‘yansandan jihar Zamfara, ASP Yazid Abubakar, wanda ya tabbatar da faruwar lamarin ga gidan talabijin na Channels, ya ce, an yi garkuwa da mutane da dama wadanda ba a iya tantance adadinsu ba a harin.
Ya kara da cewa, tuni jami’an tsaro suka fantsama daji don ganin an ceto mutanen da aka sace.
Sai dai, ASP Abubakar ya musanta rahotannin da ke cewa, an yi garkuwa da ‘yansanda biyar a lokacin da suke artabu da ‘yan ta’addan.
