Tsohon Mataimakin Shugaban Ƙasa, Atiku Abubakar, ya zargi Shugaba Bola Tinubu da fuskantar ’yan Nijeriya, duk da cewa yana neman ƙarin wa’adin mulki na shekaru huɗu a zaɓen 2027.
A cikin wata sanarwa da tawagar yaƙin neman zaɓensa ta fitar, Atiku ya ce ya kamata Tinubu ya bayyana wa ’yan Nijeriya yadda gwamnatinsa ta magance matsalolin tattalin arziƙi cikin shekaru uku da rabi da suka gabata.
Ya ce ’yan Nijeriya da dama na fama da tsadar kayan abinci, kuɗaɗen magani, raguwar darajar kuɗaɗe da rashin aikin yi.
Atiku ya bayyana cewa ya kamata Tinubu da kansa ya amsa tambayoyin ’yan Nijeriya, maimakon aika gwamnoni, ministoci da sauran ’yan siyasa su kare gwamnatinsa.
Ya ƙara da cewa masu zaɓe za su yi la’akari da halin da suka shiga a lokacin mulkinsa wajen yanke shawarar wanda za su zaɓa a 2027.
