Kotu Ta Wanke Bejamin Mendy Daga Zargin Fyade

Wata kotu a Ingila ta wanke dan wasan baya na kungiyar kwallon kafa ta Manchester City, Benjamin Mendy daga daya daga cikin tuhume-tuhumen da ake yi kan laifin aikata fyade.

An wanke Mendy mai shekara 28 a kotun Chester Crown da aka tuhumeshi kan yi wa wata ‘yar shekara 19 fyade a gidansa a Prestbury a Cheshire, ranar 24 ga watan Yulin shekarar bara kuma ya musanta zargin.

• Da Dumi-dumi: Chelsea Ta Sallami Kociyanta, Tuchel

Shima Louis Saha Matturie, mai shekara 41, wanda ake tuhuma tare da Mendy kan fyaden matar ba a same shi da laifi ba amma za su ci gaba da amsa sauran tuhamar fyade nan gaba da koda yaushe suke musantawa.

Ranar Talata alkali Stephen Eberett ya wanke mutanen biyu da soso da sabulu, bayan da masu shigar da kara suka kasa gabatar da kwakkwarar shaida wadda za ta tabbatar da laifin da ake zargin mutanen guda biyu.