Illar Amfani Da Manhajar VPN Ta Kyauta

Manhajar Free VPN, wani application ne da yake ba da damar yin dukkan nau’i na browsing a kyauta, amma yana da illoli matuka ga wayoyi da kuma rashin sirri ga mutum.

Yin amfani da manhajar VPN na kyauta yana da matukar hadari, zai iya iya janyo wa mutum abin da ko da wasa baya taba tunaninsa.

• Kotu Ta Sake Hana DSS Cafke Gwamnan CBN, Godwin Emefiele
• Sin Ta Fadada Samar Da Kwayoyin Ibuprofen Da Paracetamol 

Gara ma wanda ake biya kafin amfani da su din, domin shi din ana iya kare bayanan sirri na mai amfani da shi a kan kudin da bai taka kara ya karya ba.

Akwai mutane da dama wadanda suke jin dadin amfani da manhajar BPN na kyauta, to ya kamata tun wuri su sani cewa, amfani da BPN yana tattare da illoli, gasu a kasa za mu yi bayani daya bayan daya.

Za A Iya Satar Bayananka

Yawancin masu amfani da BPN ba su da masaniyar za a iya satar bayanansu cikin sauki. Daya daga cikin muhimman dalilan amfani da manhajar BPN shi ne ganin an kare ka daga masu kutse, to amma fargabar ita ce maganar gaskiya wasu manhajojin na BPN na kunshe da wani siddabaru da ake amfani da shi wajen satar bayananka da kuma amfani da wannan dama wajan aiwatar da wata mummunar manufa da ake son cimmawa.

Irin wadannan manhajoji na kyauta na BPN na amfani da tallukan da suke sanya wa masu amfani da su wajan wawashe bayanansu, kasancewar sun dogara ne da ‘yan tallukan da suke samu wajen samun kudin shiga.

Bibiyar Duk Abin Da Kake Yi

Wasu suna amfani da Manhajar BPN ne, saboda kare sirrinsu a lokacin da suke bincike a Internet ba, to sai dai yawancin manhajojin BPN na kyauta na da wasu mutane da aka sanya da ke bibiyar abubuwan da ke faruwa a cikinsu, suna tattara bayanan masu amfani da su, don haka a wannan bigire maimakon a aiko maka da wani tsari da kake da damar amincewa da shi ko ka latsa kalmar a’a, sai kawai a tunkudo maka talla, wanda a lokacin da kake kallonsa sai kuma a rika kwasar bayananka salin alin ba tare da ka danna komai ba.

Takaita Samun Bayanai

Yawancin BPN na kyauta na takaita adadin bayanan da za ka iya amfani da su. Suna yin wannan ne don tura masu amfani da su zuwa tsarin da ake biyan kudi kafin a samu cikakkiyar damar yin abinda ake son a yi, kamar yadda Hausawa ke cewa ”Iya kudinka iya shagalinka”

Manhajar BPN na haifar da damuwa ga masu amfani da ita saboda yadda take jinkirta sadarwar Internet (rashin sauri).

Manhajar BPN na kyauta na haifar da jinkiri wajen samun bayanai a Internet, abin da ke kawo damuwa ga wanda ke amfani da su, to dalilin shi ne yawancin mutane na raja’a ne ga na kyauta don cin bulus.

Sannan su kansu tallukan da suke sanya wa da zummar satar bayanai na iya haifar da rashin saurin na Internet, dalilin sanya tallan shi ne tun da masu amfani da su garabasa kawai suke ci, to bari su tallata wata haja tun da dama masu karin magana sun ce ”Da ruwan ciki ake jan na Rijiya”.

Barazanar Harbuwa Da Cututtukan Intanet

Manhajojin da ake amfani da su wajen sadarwa a waya ko na’urar kwamfuta ko kuma Internet na dauke da wasu hanyoyi da yawa da ake sanya wa a cikinsu wajen satar bayanai ko yin kutse ko shirya wani siddabaru.

Wasu manhajojin na BPN da ake amfani da su a kyauta ana tsara su ne da zummar cewa masu su suna da ikon sarrafa bayanan mutane yadda suka ga dama, kuma suna ba da wannan ikon ga abokan cinikinsu masu biyan kudi don riba.

Wannan yana da matukar hadari kamar yadda ma su aikata laifuka ta yanar gizo ke iya yin amfani da wannan yanayin don kaddamar da hare-hare kan masu amfani da BPN da ba su da masaniyar duk wannan al’amari.

Manhajojin BPN na tattare da sarkakiya iri iri da ke da bukatar zuba kudi da yawa a harkar don samar da kariya da kuma tsare bayanan ma su amfani da su. Akwai kuma bukatar masu su, su rika sabunta tsare tsaren ba da kariyar da suke amfani da su akai-akai daidai da zamani domin tabbatar da kare abokan huldarsu.

Sai dai kash, rashin mayar da hankali ga wadannan abubuwa da suka kamata ne ya sa masu manhajar BPN ta kyauta ke cin karensu babu babbaka ta hanyar cusa talluka da wasu tsare-tsare da ke zama babban hadari ga masu amfani da manhajar.

A kashin gaskiya, wannan ba wai kawai abu ne mai matukar hadari ba, ya kuma ci karo da dokokin bayar da kariya da tsaro da su kansu ka’idojin amfani da manhajojin na BPN.

Amfani da manhajar BPN zai zama ba ka da cikakkiyar kariya a dukkan mu’amalarka ta Intanet. Wasu kasashen tuni sun haramta amfani da manhajar BPN, saboda hadarin dake tattare da ita. Dukkan sirrikanka suna hanun BPN muddin kana amfani da manhajar BPN. Sannan amfani da manhajar BPN yana zukar data fiye da na normal data.