An Kama Wasu Ƴansanda Kan Zargin Kisan Ɗalibin Jami’ar Kwara

Rundunar ‘Yansandan Jihar Kwara ta kama wasu jami’anta da ake zargi da hannu wajen mutuwar Suleiman Olayinka, ɗalibi a Jami’ar Jihar Kwara (KWASU) dake Malete, mai shekaru 27.

Kakakin rundunar, Toun Ejire-Adeyemi, ta tabbatar da kamen, amma ba ta bayyana sunayen jami’an ba. Lamarin ya faru ne a yankin Tanke da ke Ilorin.

• ‘Yansanda Sun Karyata Jita-jitar Kai Harin Garkuwa Da Mutane A Jami’ar BUK
• Matsalar ‘Yan sandan Amurka Ta Nuna Karfin Tuwo Na Kara Tsananta

Rahotanni sun nuna cewa, wasu Ƴansanda uku sun karɓi Olayinka a ranar Talata bayan ya cire kuɗi a wajen mai PoS. Duk da iƙirarinsa na kasancewa mai asma, an yi zargin jami’an sun ja shi a ƙasa ba tare da la’akari da roƙonsa ba.

Rundunar ta yi alƙawarin gudanar da cikakken bincike kan lamarin tare da bayar da bayani ga jama’a yayin da binciken ke ci gaba.