Rundunar ‘yansandan Jihar Katsina ta ce ta dakile wani hari da wasu ‘yan bindiga suka kai a unguwar Gatakawa da ke karamar hukumar Kankara ta jihar.
Gambo Isah, kakakin rundunar, ya ce jami’ansu sun kuma ceto mutane 18 da aka sace.
- 2023: Kuri’a Miliyan 95 Ce Za Ta Bayyana Wanda Zai Gaji Buhari – INEC
- Gwamnatin Kano Ta Yi Allah-Wadai Da Hare-Hare Da Kwacen Wayoyi Da Magoya Bayan NNPP Ke Yi
Isah ya bayyana cewa, a ranar 12 ga watan Oktoba, da misalin karfe 1 na dare, rundunar ‘yansandan ta samu kiran waya inda wasu da ake zargin ‘yan bindiga ne suka kai farmaki kauyen, inda suka rika harbe-harbe.
Isah ya ce “Da samun rahoton, DPO na Kankara ya jagoranci runduna ta musamman zuwa yankin inda suka yi artabu da ‘yan bindigar.
“Rundunar ta yi nasarar fatattakar ‘yan bindigar da ake zargi da aikata munanan ayyuka tare da kubutar da duk wadanda aka yi garkuwa da su.”
Sai dai ya kara da cewa an kashe mutane biyu a yayin harin.
“A yayin da ake duba wurin, an gano babura biyar da shanu biyu. Abin bakin ciki shi ne, mutanen kauye biyu sun mutu sannan daya ya ji rauni a hannu.
“Ana fargabar cewa an kashe da dama da ake zargin ‘yan fashi ne ko kuma sun tsere da raunukan harbin bindiga. Ana ci gaba da gudanar da bincike.”
