Mataimakin Sufeto Janar na ‘yan sanda (AIG) mai kula da shiyya ta 12 mai hedikwata a Bauchi, Audu Adamu Madaki, ya ji rauni Bayan tsallake rijiya da baya Inda wasu ‘yan bindiga suka kai wa tawagarsa hari a jihar Kaduna.
An kai harin ne a ranar Talata, 2 ga watan Agusta, 2022 da misalin karfe 2:30 na rana a Barde da ke kan hanyar Kaduna zuwa Abuja.
A cewar wata kungiyar leken asiri, Eons Intelligence, wacce ta bayyana a Ingataccen shafinta na Twitter a safiyar ranar Laraba cewa, mataimakin Babban Sufeton ‘yansanda (AIG) Madaki ya samu raunikan harsashi yayin da ‘yan bindiga suka harbe mai taimaka masa wajen ba da umarni a wani hari.
Kungiyar ta rubuta cewa: “An kai wa Mataimakin Babban Sufeton ‘yan sanda (AIG) mai kula da shiyya ta 12 da tawagarsa hari a jiya 2 ga watan Agustan 2022 da misalin karfe 2:30 na rana a unguwar Barde Zangidi da ke Jihar Kaduna.”
Sai da cewa, har yanzun lokacin rubuta wannan rahoton, hedikwatar shiyya ta rundunar ‘yan sandan Nijeriya (NPF) da ke Bauchi, ba su fitar da wata sanarwa game da harin ba.
