Chelsea Ta Nuna Sha’awar Daukar Matashin Dan Kwallon Arsenal

Chelsea na shirin zawarcin dan wasan tsakiya na Ingila da Arsenal Emile Smith Rowe a daidai lokacin da kasuwar saye da sayar da yan wasa ta zo karshe.

Rahotanni sun nuna cewa Blues ta sanya dan wasan mai shekaru 23 a jerin sunayen wadanda take sha’awar dauka da suka hada da yan wasan Barcelona Ferran Torres da Raphina.

• Tsohon Kocin Man City Roberto Mancini Ya Zama Sabon Kocin Saudiyya

Tuni dai kungiyar ta Landan ta kashe kusan fam miliyan 350 wajen siyan yan wasa a wannan bazarar, ciki har da Moises Caicedo da sauran yan wasa irin su Lesley Ugochukwu da Romeo Lavia.

Duk da cewa babu wata tattaunawa a hukumance tsakanin kungiyoyin biyu, Smith Rowe yana sha’awar barin Gunners bayan da ya kasa samun buga wasannin farko na Arsenal uku na EPL a kakar wasa ta bana.