Dan Majalisar Wakilan APC Ya Rasu

An tabbatar da mutuwar wani dan majalisar wakilai ta tarayya.

Dan majalisar tarayya mai wakiltar mazabar Isa-Sabon Birni a karkashin jam’iyyar APC, Abdulkadir Jelani Danbuga, ya rasu ranar Laraba.

• Jamaica Na Neman Greenwood Ya Koma Wakiltarta A Kwallon Kasa
• Muna Fatan Dawowa Kan Ganiyarmu – Eric Ten Hag

Dan majalisar mai wakiltar mazabar Sabon Birni ta kudu a majalisar dokokin jihar Sakkwato, Aminu Almustapha (Boza) ya tabbatar da rasuwar.

A cewar Boza, dan majalisar tarayyar ya rasu ne da misalin karfe 12:30 na safiyar ranar Laraba bayan gajeriyar rashin lafiya.

An ce an kwantar da shi a wani asibiti da yammacin ranar Talata.

“Za a kai gawarsa zuwa Masallacin kasa domin yi masa wanka, daga nan kuma za a kai gawarsa Sakkwato domin yi masa jana’iza da misalin karfe 11 na safe,” in ji Almustapha.

Danbuga ya bar mata biyu, ‘ya’ya da jikoki da dama.