Yayin da ake tunkarar ranar 26 ga watan Oktoba, 2026, domin bayar da kyautar gwarzon ɗan wasan ƙwallon ƙafa ta Ballon d’Or, an bayyana muhimman abubuwa uku da za a yi la’akari da su wajen zaɓen wanda zai lashe kyautar ta bana.
Waɗannan abubuwa sun haɗa da nasarorin da ɗan wasa ya samu a matakin kansa, kofunan da ya lashe tare da ƙungiyarsa da kuma ɗabi’arsa a lokacin da yake taka leda.
A cewar ƙa’idojin zaɓen, abu na farko shi ne irin bajintar da ɗan wasa ya nuna da kuma nasarorin da ya samu a kakar wasa.
Na biyu shi ne muhimmanci da kuma yawan kofunan da ya lashe tare da ƙungiyarsa.
Na uku kuma shi ne ɗabi’a da yadda ɗan wasan ya nuna ƙwarewa da mutunci a filin wasa.
Ana gudanar da zaɓen wanda zai lashe kyautar ne ta hanyar jefa ƙuri’a, inda ’yan jarida, masu horar da ’yan wasa da kuma kyaftin ɗin ƙungiyoyin ƙasa ke taka rawa wajen zaɓen gwarzon ɗan wasan na bana.
Kyautar Ballon d’Or na daga cikin manyan lambobin yabo da ake bai wa ƙwararrun ’yan wasan ƙwallon ƙafa a duniya, domin karrama bajintarsu da nasarorin da suka samu a kakar wasa.
