Assalamu alaikum. Barkanmu da sake saduwa a wannan mako a cikin wannan shafinnamu na Girki Adon Mata.
A yau filin namu zai mayar da hankali ne a kan yadda ake gurasar filawa.
Abubuwan da ya kamata Uwargida ta tanada:
Filawa, Yeast, abin suya, Kolikoli, Kabaj, Albasa, kokumba, Tumatur,
Yadda Uwargida za ki hada gurasar fulawa:
Za ki samu robarki sai ki zuba fulawa daidai yadda za ki yi sannan ki zuba yeas daidai ki gauraya sannan ki zuba ruwa ki kwaba ya kwabu sosai kar ya yi kokkolle ya mulku sosai sannan kar ya yi ruwa ya dan yi kauri kamar na fanke, sannan sai ki rufe ta sosai ki kai ta wajen zafi saboda ana so ta taso kamar masa idan ta taso sai ki kunna wuta ki dora abin suya ki bar shi ya yi zafi idan ya yi zafi, sai ki zuba kullinki ba za shi ya yi fadi da kuma kauri ki rage wuta saboda kar ya kone, amma ba’a sa ma abin suyar mai haka ake yi ba mai kina yi kina dubawa idan kasan ya yi brown sai ki juya shi samansa ma ya yi idan ya yi sai ki cire haka za ki yi ta yi har ki gama.
Sai kulikulin ki daka shi ki sa masa dan magi, gishiri da dan tarihu idan ya daku sai ki barbada shi a saman gurasar ko ina sannan ki yanka kabaj ki wanke shi ki zuba shi a kwalanda ki bar shi ya tsame ruwa sai ki wanke kwakwamba itama ki yayyanka ta kanana ki yanka albasa da tumatur ki barbada su a saman ta. A ci dadi lafiya.
