Babban sakatare a sakateriyar yarjejeniyar tsarin tinkarar matsalar sauyin yanayin duniya ta Majalisar Dinkin Duniya ko UNFCCC, Mista Simon Stiell, ya halarci wani taron karawa-juna-sani da ya gudana a jami’ar Tsinghua ta kasar Sin a kwanan baya, inda ya yi jawabi dangane da yayata ra’ayin inganta hadin gwiwar mabambantan kasashe a fannin tinkarar sauyin yanayin duniya, kuma sau da dama ya rika ambatar babbar gudunmowar da kasar Sin ta samar a wannan fanni.
Bayan taro, mista Stiell ya yi hira da wakilin CMG, inda ya kara da cewa, yadda kasar Sin ta sauya tsarin tattalin arzikinta zuwa na kare muhalli, da rage fitar da iska mai dumama yanayi cikin matukar sauri, abu ne mai ban mamaki.
A cewarsa, manufar ta kasar ta samar da guraben aikin yi, da damar raya tattalin arziki, da sa kaimi ga aikin kirkiro sabbin fasahohi, baya ga samar da alfanu ga sauran kasashe daban daban.
Ya ce, ci gaban kasar Sin ya sa ana ta samun ci gaba da matukar sauri, a fannin kera motoci masu amfani da wutar lantarki, da fasahohi masu alaka da makamashi daga hasken rana, da na karfin iska, wanda ya kasance batu mai amfani ga sauran kasashe. (Bello Wang)
Discussion about this post