Akwai rukuni na abincin Hausawa wadanda su Hausawan ne suke yi ba tare da sun gani daga wata al’umma ba, sai dai kawai don ci gaban zamani ne ya haifar da samuwarsu.
Idan aka kula za a gani wasu daga cikin kayayyakin hadin su ba na gargajiya ba ne na zamani ne, amma za mu fahinci sun yi amfani da basirarsu ta zamani ne suka kirkiro su, kamar yadda aka samu na garajiya. Ga dai kamar haka;
- Alkawurana Ga ‘Yan Nijeriya Kan Tsaro, Zaman Kashe Wando Da Tattalin Arziki — Kwankwaso
- Hadari Gabas… Tsugune Ba Ta Kare Ba A Jam’iyyar PDP
Hallaka Kobo,
Kayan hadinsa: Sukari, Gyada. Ga kuma yadda ake hadawa:
A samu tukunya a dora a wuta, sai a zuba sukari a yi ta juyawa har sai sukarin ya narke sai a debo gyada dai-dai misali a zuba a yi ta juyawa har sai ya hade jikinsa. Sannan a samo tire a shafa masa man gyada. Bayan haka, sai a juye sukarin, idan ya dan sha iska sai a sa wuka a yayyanka yadda ake so, in an yi haka an kammala yin Hallaka Kwabo.
Hanjin Ligidi
Kayan hadinsa: Sukari, Tsamiya, ga kuma yadda ake hadawa:
A mataki na farko sai a samu jarida ko wata takarda mai girma a yayyanka a nade kamar yadda kaho yake, wato kasan ya yi tsini sama kuma ya bude, a sa kasa a roba ko wani abu mai fadi da zai dauki kasar a soka jaridar da aka nade din a cikin kasar. Sannan sai a jika tsamiya a ajiye a gefe, a samu tukunya a zuba sukarin a ciki a dora a kan wuta a yi ta juyawa har sai sukarin ya narke sai a dauko ruwan tsamiyar da aka jika a zuba a kai, za a ga ya taso sai a yi ta juyawa har sai ya hadu, sai a rika diba ana zubawa cikin jaridar da aka nada daidai gwargwado ana kuma saka masa tsinke a cikin kowanne.
Alewar Madara
Kayan hadi: Madarar gari, Sukari, da Filebo. Ga kuma yadda ake hadawa:
A mataki na farko sai a dora ruwa dan daidai a wuta sai a zuba sukari ya tafasa har sai ruwan ya yi kauri, sai a zuba filebo kadan a kawo madara ana zubawa ana tukawa kamar yadda ake tuka tuwo har sai ya yi tauri dai-dai misali, kar ya yi ruwa, sai a nemi tire a shafa man gyada sai a zuba dafaffen sukarin a kai a yanka daidai yadda ake so.
