Ƙungiyar Manyan Ma’aikatan Bankuna, Kamfanonin Inshora da Hukumomin Kuɗi ta Ƙasa (ASSBIFI), ta bayyana cewa albashin mafi ƙaranci na ƙasa na ₦70,000 bai wadatar wajen tabbatar da rayuwa mai kyau ga ma’aikatan Nijeriya ba.
Ƙungiyar ta bayyana albashin a matsayin wanda bai kai matsayin biyan buƙatun yau da kullum na ma’aikata ba, tana mai cewa, “ko tashar mota, albashin ba ya kai ma’aikaci.“
ASSBIFI ta bayyana hakan ne a Legas ranar Laraba, yayin bikinta na shekara-shekara na Duniya mai taken “Ranar Aiki A Tsaftace da Rayuwa Mai Kyau”, inda ta yi kira ga Gwamnatin Tarayya da ta gaggauta ɗaukar matakan rage tsadar rayuwa da inganta jin daɗin ma’aikata.
Mukaddashin Shugaban Ƙungiyar na Ƙasa, Fanimokun Adesina, ya ce ma’aikata sun cancanci albashin da zai ba su damar kula da iyalansu tare da tabbatar da samun rayuwa mai mutunci.
Ya ce, “Muna buƙatar kawo ƙarshen ƙasƙantattun ayyuka. Ma’aikaci ya cancanci albashin da zai ba shi damar rayuwa mai kyau, ba wannan ‘alawus’ na ₦70,000 da ko tashar mota ba ya kai ma’aikaci.
“Muna buƙatar albashin da zai inganta yanayin rayuwa, da kuma tsarin kariyar zamantakewa da zai tabbatar da mutunci da kuma damar ma’aikaci na rayuwa bayan ya yi ritaya daga aiki.”
